Bandièra01 capçalera  1180x150: Novestivada

Actualitats

Front comun de Corsega, Sardenha e las lllas Balearas per negociar amb l’Union Europèa

Los govèrns regionals de Corsega, Sardenha e de las Illas Balearas parlan ensems al Comitat de las Regions dins la negociacion dels fonzes europèus per obténer mai de reconeissença de l’insularitat e una fiscalitat especifica

| Govern de les Illes Balears
Los govèrns regionals de Corsega, Sardenha e de las Illas Balearas an bastit un front comun per parlar ensems al Comitat de las Regions dins la negociacion dels fonzes europèus, mai que mai per obténer mai de reconeissença de l’insularitat e una fiscalitat especifica per las illas. Atal o expliquèt diluns passat la presidenta de las Illas Balearas, Francina Armengol, durant l’inauguracion de la Reünion Mediterranèa que comptèt amb la preséncia del president de Sardenha, Francesco Pigliaru, e lo de Corsega, Gilles Simeoni.
 
“Se sèm diferents del continent, nos cal èsser tractats d’un biais diferent pels nòstres estats e per l’Union Europèa”, çò diguèt Armengol, segon çò que rapòrta VilaWeb. Atal cerquèt de remembrar que las caracteristicas dels territòris insulars lor limitan las possibilitats a respècte dels territòris continentals. “S’obtenèm pas que nòstres estats e l'UE nos tracten d’un biais diferent, obtendrem pas que nòstres ciutadans sián a egalitat de condicions amb los autres”.
 
La presidenta baleara exigiguèt als estats espanhòl, francés e italian mai de compreneson e mai de sosten per facilitar la reconeissença de las institucions europèas. Es per aquela rason qu’a manifestat son interès a crear un fons d’insularitat europèu per cadun dels tres territòris insulars. Un fons que siá de tot independent e complementari del sistèma de finançament pròpri, que servisca a respondre als investiments de besonh tocant al transpòrt, a las infrastructuras, a las telecomunicacions, a l’energia e a l’environament. Aquel fons permetrà tanben de finançar los escambis e las cooperacions amb los autres territòris insulars.
 
Lo president del conselh executiu de Corsega, lo sobeiranista Gilles Simeoni, remembrèt lo trabalh fach amb Sardenha e se regaudiguèt que las Illas Balearas jonguèsse aquel front comun que refortís lo procès de collaboracion. Lo president sarde remarquèt lo concèpte de Mediterranèa Occidentala coma “pòl estrategic d’equilibri amb lo bacin ribairenc del sud”.
 
D’un autre costat, lo president sarde Francesco Pigliaru soslinhèt cèrts aspèctes concrets restacats a l’insularitat, coma lo transpòrt, ont cal “de solucions normativas”. E mençonèt tanben de melhoraments d’infrastructuras del sector de l’energia. D’un autre costat, en çò que tanh a la promocion dels territòris insulars, diguèt que caliá melhorar las connexions en ret per equilibrar la competitivitat amb los autres territòris.
 



Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Cal lutar per poder vencer.

  • 3
  • 0
sant-Simforian
1.

de terras qu'environa la mar, l'una parla encara latin, tant siá pauc evoluat, la segonda parla italian, mai vou pas que lo siegue dich, per éli parlan cors e an rason, coma lei norvegians que decidiguèron un bèu jorn que parlavan pas danés, mai una autra lenga lo norvegianque dins l'escrich li sembla coma doas gotas d'aiga ,en mai d'aquo divisada en doas lo riksmal e lo landsmal, enfin d'illas catalanas qu'aurián pôscut coneisser lo destin de Gibraltar e que vist la disparitat de sei dialèctes ,an donat neissença a monsenh Alcover, lo sant ome dau diccionari, tres insularitat que se cercan e que s'an trobat dins una aliança politico-lenguistica, opausada ai nacionalismes estataus, Coma amb lo bon colesterol, totis tres fan partida d'aquelei nacionalistas que fan de ben a l'organisme e que l'escagassan pas... encara qu'aguèron parlat sobretot d'economia e de reinvicacions, aquo per ieu es una divina coïncidéncia

  • 5
  • 0

Escriu un comentari sus aqueste article