La Cort Penala d’Anglatèrra e Galas condemnèt dimècres passat a perpetuitat Thomas Mair per lo “murtre terrorista” de la deputada del Partit Trabalhista  Jo Cox, qu’aqueste perpetrèt una setmana abans lo referendum del Brexit. Mair es estat tanben declarat colpable de possession d’arma de fuòc amb l’intencion de cometre un delicte e de possession d’una arma ofensiva, çò a raportat lo ministèri public, çò rapòrta The Guardian e Europa Press.
 
La cap de la Seccion Antiterrorista e de Crimes Grèus del ministèri public, Sue Hemming, a soslinhat que Mair auriá comés un “murtre brutal” amb la deputada Cox, una “femna sens defensa, maire de dos enfants que serviguèt los electors amb passion, euforia e vam e qu'èra fièra de representar una comunautat divèrsa”.
 
“Divèrsas personas ensagèron amb coratge de salvar Cox, comprés l’òme de 77 ans Bernard Kenny, que foguèt tanben ponhardat per Mair e que patiguèt de feridas grèvas”, çò expliquèt Hemming. La procuraira expliquèt que Mair aviá pas donat d'explicacions suls actes e qu'èra demostrat qu'aviá agit per “òdi” e “deliberadament” per cometre de crimes que son “d'actes de terrorisme” pensats per avançar en sa “ideologia torçuda”.
 
“Las nòstras pensadas son amb la familha de Jo Cox, qu'a assistit al jutjament e que s’a comportat amb una vertadièra fòrça e dignitat en tot moment”, çò afirmèt la procuraira. “Lo ministèri public contunharà de trabalhar amb la justícia per combatre los qu'ensajan semenar l’òdi e la division en aprigondint dins las ideologias extremistas”, çò concluguèt.