Lo govèrn de Brasil s’es vist tornarmai ligat a un afar de corrupcion politica puèi que son nòu president, Michel Temer, es estat acusat per un ancian ministre de far pression per ajudar un aliat del president. Temer foguèt elegit president del govèrn brasilièr après la destitucion parlamentària de Dilma Roussef, fa solament 6 meses.
 
Aital, l’èx-ministre de la cultura, que foguèt ministre amb Temer fa solament pauques meses e pendent pauc de temps, acusèt lo president davant la polícia federala de lo quichar per poder bastir un gratacèl de luxe dins la vila de Salvador en un lòc qu’èra enebit d’i bastir res. E aquò pr’amor qu’un aliat politic de Temer, Geddel Vieira Lima, aviá fach un investiment dins divèrses apartaments d’aquel edifici.
 
Es per aquela rason que divèrses caps de l’oposicion diguèron aquesta dimenjada passada que s’aquò èra vertat, començariá la destitucion politica de Temer per un afar grèu de corrupcion. D’un autre costat, lo burèu de Temer a confirmat qu’avián parlat d’aquel afar amb Lima mas qu’aquò se passèt solament per cercar de trobar una solucion al problèma.
 
De fach, l’afar de corrupcion foguèt descobèrt pels jornals del país quand se saupèt que divèrsas convèrsas de Temer èran estadas enregistradas, çò que permetriá a la Còrt Suprèma de Brasil de començar far d’enquèstas. “Se los enregistraments mòstran que lo president a volgut trabalhar mai per sos interèsses privats que pels publics —çò diguèt José Roberto de Toledo, un jornalista del jornal O Estado de São Paulo— sa presidéncia es ja acabada”.
 
E tot aquò pendent un grand escàndol, ara, e ont divèrses politicians aliats del president Temer vòtan una amnestia per se sauvar eles meteisses de divèrses afars de corrupcion que i aguèt pendent la darrièra campanha presidenciala. E entre qualques unes d’aqueles afars an trobat que lo quite Temer despassèt los limits del finançament politic. Solament aquò lo suspendriái per 8 ans.
 
E mai, lo partit de Temer, lo Partit pel Movement Democratic Brasilièr, a vist dos de sos membres, Eduardo Cunha —que participèt directament a la destitucion de Roussef— e Sérgio cabral —ancian governador de Rio de Janiero— son estats arrestats per la polícia brasilièra per plusors afars de corrupcion. E en mai d’aquò, lo cap del partit al Senat, Renan Calheiros, tanben lucha ara contra mai d’una acusacion de corrupcion per aver permés lo pagament de divèrses montants d’argent a un filh illegitim de la part d’un lobby amic sieu.
 
E mentretant la popularitat de Temer cèssa pas de davalar, mentre qu’el assaja de portar de solucions a una economia que ja fa longtemps que fonciona pas brica. Plusors ministres an quitat lo govèrn en tot voler mostrar que vòlon pas èsser meses en examen, e demest eles lo ministre Anticorrupcion.
 
 
 
 
Christian Andreu