La region qu’a pres lo nom d’Occitània serà la primièra d’energia positiva en Euròpa, sostendrà lo CIRDÒC e las lengas catalana e occitana. Vaquí las conclusions mai estrambordantas del debat d’orientacions budgetàrias 2017 que se debanèt diluns passat al pargue de las exposicions de Montpelhièr, que tractèt mai que mai la question de l’eficacitat energetica e de las energias renovelablas en tot se metre a l’òbra, çò rapòrta Midi Libre.
 
Atal, s’aprovèt lo projècte per far de la region la primièra d’energia positiva en Euròpa en 2050. S’anóncia de “reduire per dos la consumacion d’energia dels abitants e de multiplicar d’un 250% la proposicion d’energias renovelablas”, çò diguèt a La Dépêche la vicepresidenta de la region Agnès Langevine. En çò que tanh a la consumacion d’energia, la region desira “massificar la renovacion de l’abitatge, l’estendre a las coproprietats,  a las comunas, etc”.
 
Dins aquel sens, la region es ja una de las primièras en produccion d’energias renovelablas, e lo projècte l’orienta mai que mai devèrs las eolianas, “per las qualas vam trabalhar sus l’acceptacion dels abitants amb de projèctes de territòris, mai que d’operacions pilotadas per de grands grops. Mas coma i aurà pas pus de prètz de crompa, caldrà trobar un modèl rendable”. En mai d’aquò, se lança “un apèl a un projècte regional per l’autoconsumacion de l’electricitat voltaïca”.
 
 
Sosten a l’occitan e al CIRDÒC
 
Interpelada per l’elegit Patric Roux, la presidenta de la region, Carole Delga, faguèt estat de son sosten al CIRDÒC dins sa defensa de la lenga occitana. Delga manifestèt tanben son supòrt pel catalan amb la creacion d’un ofici public per la lenga catalana.
 
 
Investiment d’un miliard d’èuros
 
E mai se las ressorsas de la region son limitats, amb un 8% vengudas de la taxa sus las cartas grisas, de nòvas competéncias devon arribar en 2017 coma los transpòrts estradièrs interurbans o los transpòrts escolars dels departaments, e doncas la region a previst d’investir un miliard d’èuros, çò es 162 èuros per abitant “per esquipar lo territòri en consequéncia, assegurar de servicis de qualitat, los transpòrts, l’educacion, l’emplec”, çò indiquèt Delga a Midi Libre.
 
Carole Delga vòl desvolopar quatre prioritats: l’egalitat de las oportunitats e l’accès a l’emplec, lo desvolopament economic, l’egalitat dels territòris, refortir lo ligam social e las solidaritats. D’aquel temps la transicion energetica deu èsser un obrador transversal.
 
Concretament s’anoncièt dètz nòus licèus e una pojada en poténcia de las escòlas del numeric, la perseguida del plan d’urgéncia per l’emplec amb 90 000 formacions. Se crearà una nòva agéncia de l’energia. Lo futur contracte de plan Litoral  21 deuriá aportar 200 000 èuros d’investiment e lo plan Marshall per lo BTP se perseguirà amb 636 milions d’èuros engatjats al 1r de novembre.
 

#Région#Occitanie: le lancement du projet visant à faire de l'Occitanie la première région à énergie positive d'Europe est effectif. pic.twitter.com/2gK5rKUQuE

— Caroline Froelig (@cfroelig) 28 de novembre de 2016

 

Fin de l'Assemblée plénière, merci de nous avoir suivis. Les points clés des votes sont à retrouver sur notre site. https://t.co/i3rHzDSKf1

— Région Occitanie (@Occitanie) 28 de novembre de 2016