Bandièra01 1180x150: Comuna de Tolosa

Actualitats

Artur Mas a Madrid: “nos cal un estat”

Lo president afirmèt qu’entre Catalonha e Espanha i a “una fatiga mutuala”

Lo president de la Generalitat de Catalonha faguèt dijòus passat un expausat de planhs dins un collòqui a Madrid. “Çò pièger qu’un governant pòt far es de copar las alas de l’estrambòrd d’un pòble”, çò diguèt.


Lo president de la Generalitat de Catalonha, Artur Mas, dins un collòqui al Forum Euròpa de Madrid, afirmèt dijòus passat que “pendent qualques decennis avèm ensajat de transformar l’Estat per que siá lo nòstre, ara cal comprene que Catalonha a de besonh d’un estat, e d’instruments d’estat”.
 
Artur Mas considerèt qu’“es important de poder parlar”, mas avisèt sus la magnitud del procès que se debana en Catalonha e reconeguèt que la siá vesita èra “benlèu la mai delicada” entre totes los còps que foguèt a Madrid.
 
Lo president de la Generalitat afirmèt qu’entre Catalonha e Espanha i a “una fatiga mutuala” qu’es similara, segon el, a la que patisson l’Euròpa del nòrd e la del sud. Lo president catalan apondèt que Catalonha considèra qu’Espanha “la compren pas”, malgrat los esfòrces d’aportacion que fa dins l’Estat, e que per contra, Espanha considèra que Catalonha “demanda totjorn e se planh”. “Invasion competenciala, reduccions de l’Estatut, deficit fiscal, manca d’infrastructuras... aquò es çò qu’a recebut Catalonha”, çò planguèt. E ajustèt: “Catalonha a un deficit d’entre 15 e 16 miliards annals e li cal encara demandar de ressorsas. Avèm de dificultats del temps que generam de ressorsas, çò qu’a pas cap de sens”.
 
Mas remembrèt que las autoritats e las institucions, en Catalonha, an totjorn sostengut Espanha e lo rei e an fach tot çò que cal per s’i encastrar: “votèrem quitament la lei dels partits, e o faguèrem contra lo nòstre desir”, apondèt, “E per contra, qu’es aquò qu’avèm? D’invasions competencialas permanentas; se redusís l’Estatut de 2006, un deficit fiscal inamovible pendent gaireben 30 ans, de 15 miliards per an. S’es pas jamai mogut brica ni pauc. D’infrastructuras totjorn en dejós de la nòstra populacion, e al delà l’Estat paga pas a Catalonha lo sieu deute”.
 
Per rapòrt a l’identitat, lo President parlèt de “mesprètz dins las questions d’identitat de la part de las institucions de l’estat. Mesprètz per de causas acomoladas al cors de l’istòria”.
 
Fin finala Mas diguèt: “vos cal comprene qu’un pòble vòlga resòlver aquò d’un biais pacific e democratic dins un encastre estrictament europèu. Quand los catalans demandan un estat, o fan dins un encastre europèu. Sèm pas venguts fòls”.
 
Quant a la question se Catalonha es nacion o pas, e s’a drech a l’estat pròpri o pas, diguèt que s’agís d’afars que cal demandar al pòble. Dins aquel sens a parlat quitament d’eleccions s’i a pas d’acòrdi amb lo govèrn espanhòl. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Nouguier Patrick Nimes
4.

Catalonha es a un moment clau de son istòria e l'occitanisme ne'n serà
cambavirat. Malgrat una bona gestion publica, crese ben qu'es la melhora d'Espanha, Catalonha comola lo dèute public per que Madrid li pana quicòm coma 8% del PIB sens contrapartida. Parlam pas aquí de perequacion entre regions ricas e regions pauras mas ben d'una vertadièra espoliacion fiscala. Si los catalans vòlon contunhar d'existir an la possibilitat de pachejar la sobeiranetat fiscala, es un pauc çò que vòl far lo president de la generalitat Artur Mas o l'independéncia...
Dins la situacion d'Espanha m'estonariá que donèsson la sobeiranetat fiscala, donc l'independéncia me sembla la causa la mai probabla.
Faguère la manifestacion de dimarç passat e vos pòde afortir qu'aquò balhava la carn de galina.
L'esquèrra francesa totjorn a escridassar per l'euròpa dels pòbles a mancat una escasença bèla de se conformar a sas paraulas. L'independéncia de Catalonha serà un tèrratremol per l'occitanisme e un càmbi important per França e Espanha, los occitanistas devon s'entrevar de la situacion de Catalonha e l'ajudar tan coma possible. E pasmens ja sente que d'unes que i a van renfortir los estats que los escagassan.

  • 2
  • 1
Felip Potame Santa Catarina de Nil
3.

Cal pas se daissar illusionar per las aparéncias ni los discorses. Les catalans auràn pas las colhas per votar si en majoritat a un referéndum vertadièr sus l'independéncia. E las regions del Principat qui auràn votat si, com las comarcas gironinas, demandaràn un aute referendum per se poder separar de la rèsta del Principat, la Catalonha espanhòla, e formar una republica independenta. E la guèrra entre Girona e Barcelona començarà en causa de l'aiga del Ter.

  • 1
  • 2
Ausias Marc Valéncia
2.

Lo Pincipat de Catalanha non es una nacion. La nacion, son los Païses Catalans, cambacopats de tota Occitània…

  • 7
  • 0
Faidit Comuns
1.

Reprovèrbi del jorn:
"Un pas endavant, un pas endarrèr, aquò's totjorn caminar"

  • 4
  • 0

Escriu un comentari sus aqueste article