Bandièra01 1180x150: Comuna de Tolosa

Actualitats

SciénciaEconomia

L’iPhone 5, mai grand e mai leugièr

Apple a presentat la nòva generacion del telefòn

Lo nòu dispositiu aurà un ecran de 4 poces, un processor A6, un dessenh nòu d’alumini, un connector de 8 pins e la connexion LTE esperada. E aurà iOS6, la darrièra version del sistèma operatiu mobil d’Apple.


En seguissent son biais de far abitual, Apple anoncièt dimècres passat las novetats de la siá gamma de produches amb un acte plen de secretisme a San Francisco (Estats Units).
 
Apple a mes fin a las rumors qu’aquestes darrièrs meses corrián a l’entorn de la nòva generacion del sieu telefòn iPhone. Es aital qu’Apple es estat lo centre d’atencion del mond tecnologic a l’ora de presentar un nòu dispositiu, qu’a per tòca de concórrer amb los terminals de darrièra generacion de Samsung o Nokia, entre d’autres.
 
Las mesuras de l’iPhone 5 aumentan, mas es mai fin de 18% (7,7 millimètres) e pesa 20% de mens que l’iPhone4.
 
La seisena generacion del telefòn d’Apple aurà un ecran mai grand, de quatre poces; serà mai fin e la tampa posteriora serà de veire refortit. Pòt comprene tanben una camèra mai desvolopada, un connector mai pichon e de processors de quatre nuclèus.
 
Los usatgièrs esperavan ja fa un an l’iPhone 5, mas Apple anoncièt fin finala l’iPhone 4S, una nòva version del 4.
 
E i aurà pas la populara icòna de la plataforma YouTube, pr’amor que la licéncia expirèt e Apple anoncièt que la renovelariá pas. Doncas, qui vòlga veire de vidèos amb aquel programa de Google li caldrà descargar l’aplicacion dempuèi l’App Store.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
13.

Nirvana > «E jògui qu'aurem, abans dètz ans, de versions en lenga occitana per l'iPhone e per Android.»
Per Androïd, segur, s'es vertadièrament de logicial liure, dèu èsser dubèrt, e i aurà segurament un linuxian per o far.
Per Apple, soi mens segura, ak mens de jailbreajerjar lo mobil e de se far la localizacion. Cresi qu'es atal que Plataforma per la Llenga aviá fait pel catalan, lor cal demandar.

P-J. F > «Lo telefonet, esmartfòn e qué que siá mai (me'n chauti ben pro), es un biais tecnologic de vos assignar a entendre las exigéncias de totes los que se creson autorizats, professionalament o non, a vos fuilar, coma un can, ont qué siá, quora qué siá, tre que o vòlon.»
Cossí dire ? S'aquela technologie vos agrafa pas, degun vos obliga pas a la crompar. Se pot viure sens telefonet, l'avèm fait per d'ananas ! Me se n'i a que lor agradon, vesi pas perqué seriá un problema.
«Se tòqui a la vòstra pòrta, me dobriretz o pas, segon las vòstras disponibilitats e envejas, e aquò serà plan normal.»
Çò parrièr pel mobil, se pòt causir de respondre o pas en picar una simpla tòca, se cal atudar quand volèm un pauc de tranquilitat (lo mèu l'es cada nèit, pas question de me far desvelhar). Es intusiu se nos daissam dominar per l'objècte, cal pas oblidar qual es lo mèstre, sens nos un mobil es pas res ! Un ordenador tanpauc… son pas que de maquinas !

Bon ieu voli una «app» per legir lo Jornalet ! ;)

  • 0
  • 0
Pirolet
12.

Nos podèm rassegurar que dins lo lectorum del jornalet sembla que, fòra qualqua excepcion que levita del topin, i a pas tròp de colhonitge, pas gaire qu'espèran un telefonet 6, 7, 8... n, amb de sembla melhoranças coma pretèxt per furgar dins lo pòrtamoneda del brave monde.

  • 3
  • 1
garric
11.

#5
D'acòrdi ambe tu Nirvana, mès perqué invocar ton occitanisme per te justificar ? Lo telefòn mobile es çò primièr una aisina fomidabla per totes los actes de la vida vidanta...

  • 6
  • 1
Adam Kadmon La Nadièra
10.

#8 Mon car Curt Cobain de Nirvana, s'agís pas per ieu d'utilizar pas un telefòn mobil. S'agís de daissar pas los autres m'utilizar, mercés a un telefòn mobil. Lo problèma es pas dins l'objècte, ni mai dins sa novetat, plan segur, mas dins l'utilizacion que n'a la societat. Es pas qu'utilize pas un telefòn mobil : es que n'utilizi pas mai un, per quitar d'èsser tròp aisidament utilizat per de gents e un sistèmi abusius. Vertat qu'utilizi internet. Mas un corrièl, lo legissi QUAND VÒLI e i respondi QUAND PÒDI. Degun me pòt pas (fins ara) assignar e demorar a l'ostal per recebre messatges quora que siá. Amb un telefonet, ont que foguèsse, qué que faguèsse, èri pas sensat ignorar qu'òm ensajava de me jónher. Ma libertat d'òme n'èra trepejada. Balancèri aquelas cadenas d'esclavitud a la mar (biais de dire, plan segur…). Telefòn fixe e telefonet an quicòm d'intrusiu dins la vida de cadun. Se tòqui a la vòstra pòrta, me dobriretz o pas, segon las vòstras disponibilitats e envejas, e aquò serà plan normal. Mas se telefoni a çò vòstre e mai dins las vòstras pòchas de bragas, m'endintriarai alara dins la vòstra intimitat, d'autoritat, e auretz pas mai lo dreit d'ignorar qu'o fau. Tròbi aquò abusiu. Lo daumatge es mai grand que lo profièit, al mens per ieu qu'aimi tròp mon independéncia… Mas vertat es que soi benlèu (un pauc?) independentista… :-)

  • 6
  • 1
Robèrt Laurac
9.

Òsca pels telefonets d'Apple, ben pensats, utiles, que permeton tanben legir lo Jornalet e que son tanben en catalan. E quora serem madurs, benlèu serán en occitan

  • 3
  • 1

Escriu un comentari sus aqueste article