Belgica e los Païses Basses an cambiat lor frontièra de comun acòrdi. Dins una Euròpa ont los cambiaments frontalièrs pòdon èsser totjorn fòrça complicats, los dos païses an decidit de corregir la frontièra tradicionala entre los dos estats.
 
Gràcias a un acòrdi signat a Amsterdam la setmana passada, un tròç de territòri d’aperaquí dètz ectaras, que fins ara èra bèlga, es passat als Païses Basses. En contrapartida passan a Belgica d’autres terrens que son mai o mens dos còps mai pichons.
 
La rason del cambiament es arribada a causa de la modificacion del lièch del flume de Mòsa, canalizat per la navigacion dins las annadas 1960, car daissava un tròç de territòri bèlga isolat de la rèsta de l’estat e la polícia bèlga i podiá arribar solament en batèl. Per contra, la polícia olandesa i pòt accedir per tèrra, mas aviá de besonh d’una permission internacionala per i intrar.
 
Fa gaire, i se son passats divèrses incidents, dont la descobèrta d’un cadavre decapitat. Aqueles faches an aumentat lo chepic que l’endrech venga un airal sens cap de contraròtle e, per tant, las autoritats dels dos païses an pensat qu’èra “senat” de modificar la frontièra e qu’aquelas catòrze ectaras fagan partida dels Païses Basses, en prenent en compte qu’es un territòri inabitat.
Dins la ceremònia de signatura de l’acòrdi, que se faguèt al palais reial d’Amsterdam, lo ministre dels afars estrangièrs bèlga Didier Reynders diguèt que l’acòrdi demòstra qu’“en Euròpa las frontièras se pòdon cambiar de manièra pacifica”.
 
Lo cambiament de frontièra serà efectiu lo primièr de genièr de 2018, après la ratificacion dels dos parlaments.