Lo govèrn escocés a publicat lo primièr dossièr qu'explica cossí voldriá que foguèsse lo país après lo Brexit. Lo document es entitolat “La plaça d’Escòcia en Euròpa” e prepausa de se manténer dins l’espaci economic europèu.
 
Per i arribar, mòstra tres camins. Lo primièra es lo mantenement de l’actual Reialme Unit dins l’Espaci Economic Europèu e l’establiment d’un acòrdi doanièr entre lo Reialme Unit e l'Union Europèa. Lo govèrn escocés argumenta que lo resultat del referendum exigís de sortir de l'Union Europèa, mas que i a de formulas per se manténer dins l’espaci economic o doanièr europèu, coma es lo cas de Norvègia e de Soïssa. Concretament, s’i prepausa lo retorn del Reialme Unit dins l’Associacion Europèa de Liure Escambi.
 
La segonda possibilitat es que lo Reialme Unit quite l’Espaci Economic Europèu, mas que permeta a Escòcia d’i demorar, amb un acòrdi pròpri. Lo govèrn escocés explica que i a ja de cases d’estats dont una part es dins l'Union Europèa e una autra i es pas, coma aquò se passa per Groenlàndia.
 
Mas lo tèxt ditz que “la melhora opcion pel pòble escocés” es de venir un estat independent, membre de l'Union Europèa. Per aquela rason, Escòcia convocariá un segond referendum d’independéncia, en cas que lo Brexit empediguèsse quina forma que siá de collaboracion amb l’Espaci Economic Europèu.