Bandièra01 1180x150: País Invisible

Actualitats

Val d’Aran: portar la nèu amb de camions e d'elicoptèrs

Divèrses mèdias rapòrtan e analisan un fach que l’estacion d’esquí aranesa a qualificat de pontual

| infobaqueira
Aqueste ivèrn a portat paucas precipitacions de nèu suls Pirenèus, e a de païses coma la Val d’Aran, que vivon gaireben exclusivament del torisme —mai que mai de l’esquí— lor a calgut cercar de solucions. Al començament d’aquesta setmana divèrses mèdias fasián resson d’una informacion publicada sus un compte d’Instagram nomenat Infobaqueira que rapòrta d’informacions sus la principala estacion d’esquí d’Aran. Aquela informacion rapòrta, amb de fòtos, que se transpòrta la nèu amb d’elicoptèrs e de camions dels endreches pus nauts als mai basses de la montanha, per garentir que se pòsca esquiar.
 
E mai s’aquela practica se fa dempuèi lo començament de decembre, es ara que los mèdias n’an fach resson en analisant  l’afar de biaisses diferents. Mèdia.cat analisa aquela informacion segon cada mèdia e se demanda perqué degun o tròba pas estranh.
 
Segon La Vanguardia la sason d’esquí començava fòrça plan gràcias als camions que transpòrtan la nèu.
 
L’informacion pus completa la trobam sus El País. Aquel jornal explica que la manca de nèu afècta las estacions d’esquí pertot en Euròpa, e que tanben dins qualques estacions d’esquí dels Alps se transpòrta la nèu d’aquel biais. En mai d’aquò, lo jornal explica que las estacions de Catalonha o fan pas “perque pòdon pas”, e publica de declaracions del conselhièr de l'environament de la Generalitat que ditz qu’aquela practica “es legala se se limita a l’espaci natural concedit dins la gestion de l’estacion”.
 
Dins aquela informacion, l’estacion d’esquí refusa de respondre als jornalistas a prepaus del procediment d’extraccion e de transpòrt de la nèu e solament un pòrtavotz ditz que s’agís d’un “recors pontual”.
 
En mai d’aquò, dins El Periódico, un pòrtavotz de l’estacion mòstra son malèsser “per la difusion d'imatges que pòdon enganar e que son divulgats a travèrs d’un compte Instagram qu’a pas res a veire amb l’entrepresa”.
 
 
Tot va plan, totun
 
Qualques oras après la publicacion d’aqueles articles dins los mèdias, l’estacion d’esquí aranesa raportèt que la davalada de las temperaturas aviá permés la creacion de la nèu artificiala, e doncas, que caliá pas pus transportar de nèu amb de camions e d'elicoptèrs. Los mèdias de Catalonha ne faguèron resson sul pic.
 
 
Conclusion
 
De soslinhar la conclusion que fa Mèdia.cat: “L’episòdi dels camions e elicoptèrs pòt s'explicar coma una anecdòta o coma un exemple sus cossí lo cambiament climatic o cambiarà tot de manièra irremediabla quitament s’òm fa d’esfòrces amb una cèrta tòca de ridicul coma aquí. O se pòt tanben legir coma l’esfòrç eroïc d’una entrepresa per manténer la satisfaccion de sos clients. Sembla que los mèdias an causit mai que mai la tresena”.
 
Anecdòta o pas, l’estacion d’esquí Baqueira-Beret, que son sit web es tanben en occitan, fonciona a plen rendement e mençona pas aquela informacion.


 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Panamondin TOLOSA
1.

CEL INVERSE D'ISATIS TINCTORIA costa fortuna quant las flors sens rasigas perdon lors colors

  • 0
  • 0

Escriu un comentari sus aqueste article