Del 17 al 22 de genièr, los rendètz-vos occitans mancaràn pas en Cabardés amb l’Estanquet de Fasètz la Lenga en Cabardés (dimars 17), los rendètz-vos de Las Ivernalas de Cabardés a Puègnautièr (del dimècres 18 al dissabte 21) e las Ampelofoliás de Cabardés (lo dissabte 21 e lo dimenge 22).

L’Estanquet de Fasètz la Lenga en Cabardés

L’associacion Fasètz la Lenga en Cabardés festejarà sos 20 ans amb una programacion de tria per sa quinzenada que se debanarà del 26 de febrièr al 4 de març. L’acamp de genièr de l’Estanquet (Ostal de Cabardés, a Argon) que se tendrà aqueste dimars 17 de genièr a 18h30 serà l’escasença de ne presentar lo programa pel detalh (i tornarem). Coma de costuma, un sopar amical seguirà.

Per l’ora, se perseguisson las activitats costumièras: talhièr de lenga, repeticions del grop vocal Cossí que siague (que cantarà lo 28 de genièr a Vilanòva de Menerbés),….

Las Ivernalas de Cabardés: una cabussada dins l’imaginari occitan

A l’iniciativa de l’IEO-Aude, Las Ivernalas de Cabardés vos convidan, entre lo 18 e lo 21 de genièr, a quatre rendètz-vos per cabussar dins l’imaginari occitan.

Lo dimècres 18 de genièr (Na Loba, 18h30), lo Teatre de las Originas presentarà sa creacion pel jove public Cap a l’aucèl-Un oiseau dans la tête. Un espectacle ont se mesclan occitan, francés e lenga dels signes per explicar e comprene lo necessari ritme de las sasons, la corsa del temps, lo retorn de las fèstas: qualques moments indispensables per s’opausar a aqueles que voldrián mestrejar e aseptizar lo temps.

Lo divendres 20 de genièr (Na Loba, 19h), plaça al cinèma amb la projeccion del documentari de Stéphane Valentin: “Tempestaires et faiseurs de pluie” que conta cossí en Pirenèus los òmes e mai que mai las femnas ensajavan de domdar lo cèl en fasent venir la pluèja e en arrestant los auratges.

Dissabte 21 de genièr (Na Loba, 19 h), Florant Mercadièr sortirà sos Contes del placard. Amb poesia e umor, lo contaire parlarà de son vilatge que sembla lo nòstre, dels grilhs qu’escotan Bob Marley, del sit internet dels diablotons, de las bèstias que se baton per la satisfaccion de lor talent, o la nòstra: nòstra talent grandarasàs de rires e de sòmis…

En ligason amb les Ampelofoliás, un sopar convivial seguirà (20h30, sala de la Tor; sus reservacion: 04.68.25.19.78 o ieo11@ieo-oc.org)

Las Ampelofoliás de Cabardés, lo rendètz-vos de la trufa negra e del vin

Ongan, la sason rabassicòla foguèt pas de las bonas en rason de las condicions climaticas. Aquò empacharà pas la tenguda d’una brava edicion de las Ampelofoliás a l’entorn de quatre rendètz-vos dins las comunas de Cabardés:

Atal, lo dissabte 21:

— de matin, a Ventenac de Cabardés, Mirelha Braç animarà un obrador “Cosinar la rabassa” qu’aficha complet dempuèi un brave moment

— de vèspre, a Montoliu, Colette Olive parlarà de la cosina del rasim e de la cosina de la polarda.

— lo ser, rendètz-vos a Puègnautièr per la serada comuna amb las Ivernalas que vos avèm presentada çai sus (contes e sopar).

Puèi, dimenge 22, serà lo rendètz-vos bèl de Mossolens amb una fièra del terrador e de l’artisanat tota la jornada (l’IEO-Aude i ten taulièr) , lo mercat de las trufas negras (en debuta de vèspre), un concors de recèptas rabassadas, una demostracion de poda de vinha, tasta de vins (grop convidat Les Vinifilles), de jòcs pels enfants, las vesitas del conservatòri rabassicòla, la preséncia del cap cosinièr estelat Jiròni Ryon, d'entrepans e de sopas ont la rabassa ten una plaça de primièra, una mòstra de fotografias, d’animacions musicalas asseguradas per Tonton a faim e la fanfara dels Golamàs.

Alan Roch