Lo cap republican irlandés Máirtín Mag Aonghusa (apelat Martin McGuiness en anglés) anoncièt dijòus ser que quitava  la politica perque una estranha malautiá que la patís li permet pas de manténer son activitat publica. Lo dirigent del Sinn Féin abandonèt lo govèrn nòrd-irlandés fa a pena una setmana. N’èra lo viceprimièr ministre e sa sortida a provocat la convocacion d’eleccions anticipadas per renovelar lo parlament. Sens lo Sinn Féin, lo principal partit unionista, lo DUP, aviá pas de majoritat per formar un nòu govèrn.
 
Una setmana pus tard, Mag Aonghusa a anonciat que serà pas lo candidat de son partit pr’amor que deu afrontar la malautiá que la patís e que ja l’aviá daissat incapable d’exercir son cargue en qualques ocacions en 2016. A 66 ans, Mag Aonghusa l’aclapa una malautiá nomenada amiloïdòsi, una malautiá qu’ataca lo còr, los rens e d’autres organs vitals, çò rapòrta The Guardian.
 
Dins lo vidèo qu'a publicat lo Sinn Féin per anonciar la decision, lo cap republican presenta un estat força afeblit e mai magre que d’abitud.
 

 
Lo Sinn Féin deu ara cercar ara un nòu candidat per d’eleccions que poirián ganhar pel primièr còp après los acòrdis de patz e la restauracion del parlament nòrd-irlandés. Mag Aonghusa es un dels noms istorics del republicanisme irlandés, amb Gearóid Mac Ádhaimh (li dison Gerry Adams en anglés). Se considèra que foguèt lo dirigent màger de l’IRA Provisòria pendent qualques annadas, e mai s’el o a pas jamai reconegut.
 
Tre que Mag Aonghusa anoncièt sa retirada, dins son quartièr Taobh an Phortaigh, a Doire, de centenats d’abitants manifestèron per carrièras lor gratitud e reconeissença. 
 

Hundreds of people gather in the Bogside to thank @M_McGuinness_SFpic.twitter.com/LriKEfei99

— Sinn Féin (@sinnfeinireland) 19 de gener de 2017