Jos lo lèma “Euskal Errepublika” (Republica Basca), 763 personas s’amassèron aquesta dimenjada a Bilbao (Bascoat) dins un congrès de refondacion del partit de l’esquèrra independentista basca apelat Sortu. Participèron al congrès una tièra de partits e sindicats bascos e un quarantenat de delegacions internacionalas, dont de representants catalans e curds. L’occitan Dàvid Grosclaude i èra present coma delegat de l’Aliança Liura Europèa (ALE).
 
Dins lo congrès s’aprovèt la refondacion, ja sostenguda dins una fasa precedenta pel 91,5% dels militants (aperaquí 7000 personas), e s’elegiguèt los quinze membres del conselh directiu. Demest las decisions presas, an refortit lo concèpte de “desobesissença civila”, an definit Sortu tanben coma ecologista e an dobèrt la pòrta als referendums.
 
Lo congrès s’acabèt amb una presa de paraula d’Arnaldo Otegi.