Bandièra01 1180x150: Comuna de Tolosa

Actualitats

Google a creat un fons de 4 milions de dolars per sosténer las organizacions d’immigrants

Lo fons ajudarà a finançar quatre organizacions que luchan pels dreches dels immigrants

La mesura antiimmigrants de Donald Trump a desvelhada l’oposicion ferma de Sundar Pichai, PDG de Google, que proven d’Índia
La mesura antiimmigrants de Donald Trump a desvelhada l’oposicion ferma de Sundar Pichai, PDG de Google, que proven d’Índia | Maurizio Pesce
Google a creat un fons de quatre milions de dolars que la societat donarà a quatre organizacions estatsunidencas engatjadas pels dreches dels immigrants en oposicion a las mesuras qu’a presas lo president dels Estats Units, Donald Trump, que limitan l’intrada dels immigrants e refugiats dins lo país .
 
Lo montant d’aquel fons es de dos milions de dolars que los a aportats la companhiá e mai dos autres milions que provenon dels dons dels emplegats, segon çò que rapòrta USA Today. En aquel fons, i a de contribucions particularas de mai d’un dirigent de Google, que lors noms son pas estats publicats.
 
Lo fons ajudarà a finançar quatre organizacions que luchan pels dreches dels immigrants: l’Union Estatunidenca per las Libertats Civilas (ACLU), l’Immigrant Legal Resource Center, lo Comitat Internacional de Socors (IRC) e lo Naut Comissariat de las Nacions Unidas pels Refugiats (NACNUR).
 
La creacion d’aquel fons es la responsa de Google a la signatura de l’òrdre executiu que limita l’intrada als Estats Units d’immigrants e de refugiats originaris de sèt païses de tradicion musulmana, una mesura qu’a desvelhat l’oposicion del president director general de Google, Sundar Pichai, un òme que proven d’Índia.
 
 
Las societats tecnologicas contra Trump
 
Delà l’iniciativa de Google, tanben las societats Apple, Microsoft, Netflix, Uber, Airbnb e Facebook an declarat tanben lor refús de l’òrdre executiu de Trump.
 
Fòrça d’aquelas companhiás patiràn dirèctament aquelas mesuras de Trump, car una partida de lors emplegats son d’immigrants e qualques unes provenon quitament d’un dels sèt païses que segon Trump totes lors ciutadans son enebits d’intrar als Estats Units, que son Iraq, Iran, Siria, Libia, Somalia, Sodan e Iemèn.
 
Dins aquel sens, lo president de Microsoft, Brad Smith, a mandat una letra als emplegats per lor comunicar que 76 de lors collègas se veiràn afectats per la mesura, e per ansin la societat lor ofrirà una assisténcia e una defensa legalas. La letra es estada partejada per Satya Nadella, PDG de Microsoft, qu’es tanben originari d’Índia.
 
De son costat, Mark Zuckerberg a publicat un comunicat que remembra lo ròtle de l’immigracion dins la creacion del país. “Mos rèiregrands venguèron d’Alemanha, Àustria e Polonha. Los parents de Priscilla foguèron refugiats de China e de Vietnam. Los Estats Units son una nacion d’immigrants, e ne devèm èsser fièrs”, çò ditz.
 
Lo PDG d’Apple, Tim Cook, a assegurat que sostenon pas aquela politica e que la societat prepausarà una assisténcia legala als emplegat afectats. En mai d’aquò, a recordat l’importància de l’immigracion per l’origina dels Estats Units e de la quita societat Apple, que son cofondador, Steve Jobs, èra filh d’immigrants sirians.
 
 

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article