Bandièra01 1180x150: Comuna de Tolosa

Actualitats

La peticion d’una collectivitat autonòma basca es arribada al Senat francés

| EAJ-PNV

D’elegits locals bascos an demandat a las institucions francesas qu’“examinen l’ipotèsi” d’una entitat pròpria. La siá creacion poiriá autrejar un cèrt gra d’autonomia al Bascoat del Nòrd, mai que mai s’Hollande complís la promessa d’aprovar una nòva lei sus la descentralizacion en França.


Es possibla una entitat autonòma basca dins la Republica Francesa? Los membres del Conselh dels Elegits del Bascoat (CEB) pensan qu’es possible, e presentèron lo 13 de setembre passat una proposicion en aquel sens, davant los Estats Generals de la Democracia Territoriala (una larga amassada dels representants locals organizada pel Senat francés). La proposicion,  per ara, es pas grand causa e solament una idèa iniciala. Ça que la a lo meriti de sometre la question dins un forum francés en un moment ont s’albira de cambiaments a l’estructura territoriala de la republica.
 
Lo CEB aprovèt lo 7 de setembre passat a Baiona (Bas Ador) la proposicion que portarà davant los Estats Generals, que “convida” lo Senat a “examinar l’ipotèsi d’una collectivitat territoriala pel Bascoat”. L’objectiu dels representants bascos es que lo territòri “se dòte d’una forma d’organizacion e de govèrn innovatritz” que pòsca respondre als “enjòcs actuals e futurs”.
 
La contribucion del CEB se presentèt davant los Estats Generals a la reünion que se debanèt lo 14 de setembre passat al Bascoat, e los 4 e 5 d’octòbre a París. Lo procès deurà arribar a una sintèsi de conclusions elaboradas pel quite president del Senat, Jean-Pierre Bel.
 
 
Inclure lo dorsièr basco a la nòva lei de la descentralizacion
 
Çò que reclaman los elegits locals bascos es que las conclusions que sòrtan d’aquel procès serviscan per que lo dossièr basco siá reculhit dins la nòva lei sus la descentralizacion, la que lo president francés, François Hollande, a promés per aquesta legislatura. La primièra lei descentralizaira francesa es de 1982, e la segonda s’aprovèt en 2003. Segon Hollande, la nòva lei deu donar mai d’autonomia —compresa la fiscala— a las municipalitats, als departaments e a las regions.
 
Lo problèma pels bascos es que i a pas cap de departament o region que coïncidisca amb los limits del Bascoat del Nòrd. Aquel territòri fa partida, amb las tèrras occitanas del Bas Ador e de Bearn, dels Pirenèus Atlantics, que son un departament de la region d’Aquitània. Vaquí l’importància de dispausar de qualque collectivitat territoriala reconeguda constitucionalament. Fins ara, lo Bascoat dins la Republica Francesa es solament reconegut coma “pays” (país), es a dire, coma organisme de concertacion supramunicipala.
 
 
Mai informacions
 
EiTB: La demande d'une collectivité territoriale Pays Basque au Sénat
 
Le Journal du Pays Basque: Les élus défendront la Collectivité territoriale, mais pas tous...
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
1.

S'es possibla una entitat autonòma basca dins la Republica Francesa !!?

En fait, ja se tròban d'estatuts especifics e partuculars al dintre de la "republica" francesa ::
- Corsega
- Alsàcia e Lorena
-Territòri de Bèlfòrt
- totes los departament d'oltramar
- totes los territòris d'oltramar
- Kanàkia
- e benlèu d'autres encara...

Perqué amb Euskadi non seriá pas possible ? Los d'Euskadi son mens egals que los autres ???

  • 1
  • 1

Escriu un comentari sus aqueste article