Bandièra01 1180x150: Comuna de Tolosa

Actualitats

Los islamistas que contraròtlan las vilas d’Azawad “impausan de puniments violents, coma d’amputacions”

Alhader Ad Almahmud es una de las sèt personas qu’an d’extremitats amputadas coma puniment
Alhader Ad Almahmud es una de las sèt personas qu’an d’extremitats amputadas coma puniment | Amnesty International

Una recèrca d’Amnistia Internacionala denóncia de violacions de femnas e l’usatge d’enfants coma soldats de la part de las milícias religiosas. Los grops islamistas expulsèron de las vilas los independentistas laïcs de l’MNLA fa qualques tres meses.


Las milícias islamistas qu’an atengut lo contraròtle de las principalas vilas d’Azawad, al nòrd de Mali, “impausan de mai en mai de puniments violents, coma d’amputacions, après de jutjaments falses als acusats de cometre de crimes”. Es una de las conclusions d’una còla d’Amnistia Internacionala (AI), qu’a menat a tèrme una recèrca pendent quinze jorns dins lo país african. Las amputacions, çò ditz AI, son la pena per delictes de panatòri que lo Movement per l’Unicitat e lo Jihad en l’Africa de l’Oèst (MUJAO) impausa dins la vila de Gao.
 
Es pas l’unica violéncia fisica que los islamistas menan a tèrme en Azawad. Segon los raportaires d’AI, un òme apertenent a la fòrça de l’òrdre establida a Tomboctó per Al Qaida al Magrèb Islamic (AQMI) violèt una joventa de 14 ans. L’òme es pas estat expulsat del còrs policèr, çò explica l’organizacion.
 
AI assegura tanben qu’a documentat l’usatge d’enfants coma soldats, tant de la part de las milícias islamistas d’Azawad, coma de la part dels grops armats del sud de Mali que vòlon reconquistar lo territòri.
 
 
Pèrda del contraròtle de la part de la milícia toarèg laïca
 
Totes aqueles eveniments se debanan tres meses après que lo MUJAO, AQMI e los sieus aliats d’Ansar Dinni atenguèsson lo contraròtle de Tomboctó e de Gao, las doas principalas vilas d’Azawad, en ne fòrabandir los combatents majoritàriament toarègs del Movement Nacional de Liberacion d’Azawad (MNLA).
 
L’MNLA assegura que manten la siá preséncia en defòra de las grandas vilas d’Azawad e qu’espèra una conjontura favorabla per n’expulsar los islamistas.

 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ibn' Sinà Narbona
2.

Los integristas, los salafistas non son pas musulmans, ja que lo musulmans servisson Allah e qu'Allah es Amor, mentre que los integristas servisson sonque l'asirança e lo mesprètz…

  • 1
  • 2
Pirolet
1.

Quand se mainaran los francimands que sosténer los Berbèrs e lor lenga es luchar contra l'islamisme radical e sa lenga pretenduda divina?

  • 3
  • 0

Escriu un comentari sus aqueste article