Un rinocèros es estat tuat dins lo zoò de París a causa de sas banas —qu’an un prètz d’entre 30 000 e 40 000 èuros al mercat illegal de l’evòri—. L’incident es estat considerat coma lo primièr d’aquela sòrta en Euròpa.
 
Vince, un rinocèros blanc de quatre ans, lo trobèron mòrt dimarts passat dins son encencha del zòo de París. L’aurián tuat amb tres balas dins lo cap e li aurián serrada una bana. La nòva, pro estonanta, es una de mai demieg los aperaquí 100 rinocèros matats cada mes sus la planeta. Totun, aqueste còp, lo rinocèros se trobava dins un zòo, çò que fa pensar que la cobesiá umana a pas de limits e que lèu totes los animals dels zòos europèus poirián perilhar.
 
 
Una vesita nuechenca de braconaires
 
Los braconaires intrèron dins lo zòo de París dins la nuech de diluns, tuèron lo rinocèros e li prenguèron la bana. Ça que la, sembla que poguèron pas acabar lor l’operacion, puèi que daissèron la segonda bana, parcialament serrada, amb lo còrs de Vince.
 
La polícia de la vila francesa a confirmat que los autres dos rinocèros qu'èran al zòo amb Vince an escapat al chaple per miracle. S’agís de Gracie (37 ans) e de Bruno (5 ans). Bruno e Vince èran arribats al zòo de París fa gaire. Vince èra nascut dins un zòo dels Païses Basses e arribat en 2015, èra un dels 250 rinoceròs que fasián partida d’un programa de recuperacion d’aquela espècia, qu’es en grèu perilh d’extincion.
 
En despièch d’aquel fach, l’afar dels rinocèros blancs en Euròpa es una reüssida de las bèlas. I aviá plan pauques especimèns a la fin del sègle XIX, mas a l’ora d’ara la populacion a crescut fins a aperaquí 2000 animals.
 
Totun, la populacion a tornat descréisser pendent los darrièrs ans pr’amor que la demanda d’evòri —que qualques unes creson qu’a de vertuts afrodisiacas— rèsta plan nauta dins de païses coma Vietnam. En mai d’aquò, cal remembrar que l’estat francés enebiguèt lo trafec de l’evòri en 2016.
 
 
 
 
Christian Andreu