Bandièra01 1180x150: Comuna de Tolosa

Actualitats

Crisi diplomatica entre los Païses Basses e Turquia

L’Aia empedís la vesita d’un ministre turc e n’expulsa un autre per evitar una reünion publica pel referendum constitucional turc, e de manifestacions ultradrechistas. Ankara acusa lo país d’èsser “un vestigi del nazisme”

Las manfiestacions de protèsta de la comunautat turca son nombrosas
Las manfiestacions de protèsta de la comunautat turca son nombrosas | Yves Herman / Reuters
Las autoritats dels Païses Basses an pas permés l’intrada al país del ministre dels afars exteriors turc, Mevlüt Çavuşoğlu, que voliá anar a Rotterdam per participar dissabte a un miting, que las autoritats de la vila avián enebit.
 
Çavuşoğlu aviá l’intencion d’encoratjar la diaspòra turca per que participèsse al referendum en Turquia del 16 d’abril que ven, que cèrca d’apondre a la constitucion del país una seguida d’emendaments amb la tòca que lo sistèma parlamentari devenga un sistèma presidencialista amb un espandiment de podèrs fòrça grand pel president turc, Recep Tayyip Erdoğan.
 
Amb aquela accion, los Païses Basses an jonch la decision alemanda d’interdire los actes d’aquela mena per “de rasons de seguretat”.
 
 
Expulsion de la ministra de la familha
 
En mai d’aquò, dissabte passat, las autoritats del país expulsèron la ministra turca de la familha, Fatma Betül Sayan Kaya. Declarada persona non grata per las autoritats neerlandesas, la ministra èra arribada a Rotterdam en veitura dins la serada de dissabte, per l’estrada que proven d’Alemanha, e las fòrças de l’òrdre l’escortèron en tot la tornar menar devèrs la frontièra. “Es estada expulsada devèrs lo país d’ont ela èra venguda”, çò diguèt lo cònsol de Rotterdam, Ahmed Aboutaleb.
 
 
Crisi diplomatica
 
La reaccion del president de Turquia arribèt sul pic. Lo president turc, Recep Tayyip Erdoğan, menaça lo govèrn neerlandés d'impausar de restriccions de viatge a sos diplomatas, en afirmant que las autoritats neerlandesas “sabon pas res de çò qu’es la politica ni la diplomacia internacionala”. En mai d’aquò, Erdoğan las a jutjadas “timidas”, “coardas”, “son de faissistas, son de vestigis del nazisme”.
 
 
Evitar que ne profièche l’ultradrecha islamofòba
 
Amb aquelas decisions, las autoritats neerlandesas an volgut que se tenga pas una reünion publica, qu’auriá favorit mai que mai lo partit ultradrechista e islamofòb PVV. Son cap, Geert Wilders, aviá demandat fa qualques jorns a un deputat neerlandés d’origina turca que se’n tornèsse a Turquia “per totjorn”. En mai d’aquò, lo quite Wilders èra al cap d’una manifestacion antiturca davant l’ambaissada del país otoman a l’Aia e dissabte a la cap d’una manifestacion xenofòba a Rotterdam contra la preséncia de Çavuşoğlu.
 
Oficialament Erdoğan cèrca lo vòte exterior dels 300 000 ciutadans d’origina turca que vivon als Païses Basses, e qu’an drech de vòte en Turquia. Mas en getant d’òli sul fuòc, lo president turc profiècha d’un resson maximal e ne tirarà un bon profièch: “Son de practicas faissistas. I a pas cap de diferéncia entre lo primièr ministre neerlandés e Geert Wilders”, çò afirmava Çavuşoğlu en tot avertir que i aurá de possiblas consequéncias dins l’OTAN, que los dos païses ne fan partida.
 
En tot cas, lo PVV de Geert Wilders a pas agut l’escasença, aqueste còp, d’avertir del perilh d’un miting turc als Païses Basses, que s’agiriá de “la nòva expression de l’islam que s’estend pel mond occidental”, segon lo cap ultradrechista.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Ben fait, que s'envaja a ca seva.

  • 2
  • 0

Escriu un comentari sus aqueste article