Bandièra01 1180x150: Comuna de Tolosa

Actualitats

L’ANC prepausa la proclamacion de l’independéncia se l’estat espanhòl empedís lo referendum

Lo secretariat de l'Assemblada Nacionala Catalana prevei tres scenaris possibles e fa una proposicion de fuèlha de rota

| ANC
Lo Secretariat de l'Assemblada Nacionala Catalana (ANC) prepausa que lo Parlament de Catalonha proclame l'independéncia de Catalonha e Aran en cas que lo govèrn espanhòl empedisca lo referendum. Es atal que o prepausa dins son darrièr document, que se mandèt ièr a sos mai de 40 000 sòcis que lo ratificaràn lo 29 d’abril que ven dins l’encastre de l’assemblada generala.
 
La proposicion de l'ANC prevei tres scenaris possibles:
 
— L’aprobacion de la nomenada lei de transitorietat juridica prevista pel Parlament de Catalonha per convocar lo referendum, amb una question binària e clara. Se ganha l’“òc”, l’ANC demandarà al parlament de proclamar sul pic l’independéncia e de desplegar la legalitat catalana al marge de l’espanhòla.
 
— “Ingeréncia” del govèrn de l’estat espanhòl a las institucions catalanas per empedir que lo parlament apròve la lei de transitorietat juridica, es a dire l’imposicion per la fòrça de nòvas personas que prengan lo govèrn de Catalonha e Aran. Dins aquela ipotèsi, l’ANC prevei la legitimacion del govèrn per l’Assemblada d’Elegits de Catalonha (AECAT), un organisme d'inscripcion volontària per totes los elegits, impulsat per l'Associacion de Municipalitats per l'Independéncia. L’AECAT compta a l’ora d’ara amb l’adesion de 9283 elegits. “Dins aquel contèxte, l’AECAT assumirà la representacion legitima, sobeirana e institucionala suprèma de Catalonha [e Aran] per menar a bon tèrme lo procès d'independéncia, dont la capacitat de proclamar l'independéncia, la confeccion, l'aprobacion e la sancion de las nòrmas juridicas de la nòva legalitat e la convocacion immediata de nòvas eleccions”.
 
— Dins la tresena ipotèsi, l’ANC prevei que lo parlament pòsca aprovar la lei de transitorietat juridica, mas que l’estat espanhòl empedisca amb “ingeréncia” o amb de “mesuras coercitivas” la tenguda del referendum. Dins aquel sens, se prevei la mobilizacion ciutadana per sosténer la legitimitat de las institucions catalanas, e se cal, l’activacion de l’AECAT en tot cercar lo supòrt de la comunautat internacionala.
 
VilaWeb publica lo document entièr de l’ANC.
 
 
La lei de transitorietat juridica
 
La lei de transitorietat juridica es l’instrument legislatiu principal de la desconnexion d’Espanha e l’establiment de la nòva legalitat catalana. Es la lei que deu permetre la creacion d’una nòva legalitat derivada del mandat democratic e qu'evitarà que i aja cap de void juridic dins l’accès a l'independéncia.
 
Regularà los elements basics, coma lo territòri, la nacionalitat, lo ciutadanatge, lo regim de las lengas e las institucions de govèrn e, de mai, declararà la continuitat —franc de las excepcions qu'ajan negociat d’i comprene los partits— de l’aplicacion dels actuals drech catalan, drech espanhòl, drech de l'UE e drech internacional.
 
La lei també preveurà la continuitat —per mejan de subrogacion— dels contractes de l’estat espanhòl e de la Generalitat de Catalonha e la possibilitat que los foncionaris e los salariats que prèstan lors servicis a l’administracion de l’estat espanhòl en Catalonha e Aran se pòscan integrar a l’administracion del nòu estat independent.
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Sense por i endavant, que aixó rutlla.
Com diem això es com un part, quan comença no es pot aturar.
Visca la Terra...Lliure!
L'Ernest, "El Tàrrega".

  • 0
  • 0

Escriu un comentari sus aqueste article