Franck Sinisi, elegit del Front Nacional a la comuna de Fontana (una vila arpitana del Daufinat), prepausa de recuperar las dents en aur dels gitanos, çò rapòrta Le Dauphiné Libéré. Lo conselh municipal de la vila tractava las dificultats ligadas a l’aculhença dels ròms sus l’aglomeracion de la vila, e lo cònsol màger demandèt l’implicacion de la metropòli, del departament e de l’estat. La responsa de l’elegit ultradrechista foguèt digna de son ideologia: “Per lotjar los ròms, pensi que i poiriá aver un autofinançament. La metropòli lor deuriá pagar lo dentista... per tal de recuperar lors dents en aur”.
 
L’extraccion de las dents en aur èra una practica abituala dels camps d’extermini nazis. Après las tuariás collectivas dins las cambras de gas, los òmes del Sonderkommando devián retirar los cadavres, los rasavan e recuperavan las dents en aur abans de los getar dins los poses o lo forn crematòri.