Bandièra01 1180x150: Comuna de Tolosa

Actualitats

Protèstes e cargues policières ath torn deth Congrès des Deputats en Madrid

Quauqui milèrs de manifestants que s’amassèren agèr en Madrid (Espanha) damb eth lèma “Entornegem eth Congrès”, entà protestar pera situacion politica e economica der Estat espanhòu. Diuerses protèstes e manifestacions ar entorn d’un Congrès des Deputats blindat pera polícia an acabat damb cargues policières contra es manifestants, mès de 10 heridi e un trentenat d’arrestats.


Entà reclamar un nau procès constituent e entà reformar eth sistèma politic espanhòu, era tòca des manifestants qu’ère d’entornejar era bastissa deth Congrès des Deputats. Totun, ben d’ora peth maitin, b’entornejauen ja era bastissa quauqui 1400 policèrs.
 
Fin finau, a compdar des 18h, es manifestants que s’amassauen en quauques places d’apròp en tot jónher es manifestacions qu’arribauen de diuersi endrèts de Madrid.
 
Ath torn des 19h era polícia que comencèc de cargar contra es manifestants, dempús que bèri uns e sagèssen de sautar es tanques que bloquejauen eth pas ara carrèra de San Jerónimo, a on se place eth Congrès des Deputats.
 
Quauqui deputats d’esquèrra an denonciat eth sètge policièr e an mostrat era sua solidaritat damb es manifestants.




Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
2.

La jornada del 25 de setembre es estada una jornada de protèsta, per dire que NON, los elegits de l’estat espanhòls non representan pas sos pòbles, que milions de ciutadans e de ciutadanas de tot l'Estat Espanhòl se sentiscan pas representats per de partits que, eleccion après eleccion, obtenon sas voses electoralas subre messorgas. Messorgan, e davant la reaccion ciutadana, reprimisson. E s’isòlan.

Triste espectacle que lo de la Cambra dels representants desseparada dels ciutadans, e aiçò dempuèi meses. Aquò non se ditz pas democracia.

La jornada de protèsta del 25 de Setembre s’es acabada amb 28 arrestacions e 64 nafrats, de qu’un grèvament. Una jornada confla d’indignacion, mas pacifica. Coma tantas autras. Fins a çò que la polícia, a set oras del vèspre, comencèsse de cargar contra milierats de personas que volián cridar a-n-aqueles monsurs, de prèp « Non, non nos representan pas ». Òmes e femnas de totes tempses e condicions que volián exercir son dreit a exprimir aut e fòrt son opinion.

28 detenguts, e mai Miguel Quintero, militant d’ATTAC en Galícia. ATTAC demanda sa liberacion sulpic, e la de totes los detenguts per aver liurament e democraticament exprimit son indignacion de cara a la granda engana del Congrès dels deputats e del Senat, despositari de totas las sobeiranetats, a despart de la sola que siá legitima, la dels pòbles espanhòl, galician, catalan, euskal e occitan.

  • 2
  • 0
Pirolet
1.

A Madrid tanben an ensajat de criminalizar los manifestants abans que se faguèsse lo recampament davant las Cortes. Coma per lo passa carrièra per defendre Diwan en Bretanha. Estat francés, estat espanhòl, meteis combat!

  • 4
  • 0

Escriu un comentari sus aqueste article