Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Ara fa 5 ans. Era Universitat que revise era toponimia dera Val d’Aran

Un nau mapa elaborat per Aran Culturau e revisat pera Cagira d'Estudis Occitans se presentarà dimars ena Universitat de Lhèida




Peth prumèr còp, es toponims aranesi son revisadi per ua institucion universitària: era Cagira d’Estudis Occitans dera Universitat de Lhèida. Dimars se i presentarà un nau mapa hèt per ua associacion de guides toristics dera Val d'Aran e revisat pera Universitat.



Era associacion de guides toristics Aran Culturau que presentarà aguest dimars 17 d’abriu ena Universitat de Lhèida un nau mapa toristic dera Val d’Aran qu'includís es principaus nòms de lòc deth país occitan. Aguesta presentacion qu'ei adreçada as estudiants deth Grad en Estudis Catalans e Occitans e tanben a toti aqueri que i siguen interessadi, apartenguen o non ara comunitat universitària. Era presentacion qu'aurà lòc entàs 13h30 ena aula 2.27 dera Bastissa deth Rectorat. 


Ua des novetats d’aguest nau mapa qu'ei eth hèt qu'era toponimia dera Val d’Aran que i apareish ei estada revisada pera Cagira d’Estudis Occitans dera Universitat de Lhèida. Qu'ei, donques, eth prumèr viatge qu'ua institucion academica e universitària interven ena fixacion corrècta des nòms de lòc dera Val d’Aran, dempús de determinar uns 150 toponims. Que cau arremercar que hège uns dètz ans non s'amiaue a tèrme ua intervencion semblabla ena toponimia aranesa. 


Es membres d’Aran Culturau que mostraràn publicaments aguest nau mapa, e que haràn ath madeish temps ua brèu presentacion dera geografia aranesa en occitan. Era Cagira d’Estudis Occitans que vò arremercar era importància de bastir ligams com aguest damb eth mon culturau aranés, que dan fruts totafèt positius e que beneficien ara comunitat scientifica e ara societat occitana ar encòp.

Era edicion deth mapa qu'a compdat damb eth sosten deth Conselh Generau d’Aran.




UdL / Ferriòl Macip

abonar los amics de Jornalet







 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article