Bandièra01 capçalera  1180x150: Novestivada

Actualitats

Ara fa 5 ans. 2000 presonièrs curds en cauma de la fam dempuèi 50 jorns

En Alsàcia 15 curds de mai son tanplan en cauma de la fam per far pression sul Conselh d'Euròpa

Manifestacion en favor d'Öcalan, 12 de decembre 2009 a Friborg de Brisgòvia
Manifestacion en favor d'Öcalan, 12 de decembre 2009 a Friborg de Brisgòvia | Medien AG // Anarchistische Gruppe Freiburg



2000 presonièrs curds son en cauma de la fam dempuèi 50 jorns per las condicions de l'empresonament d'Öcalan.  Los caumaires critican Turquia per aver isolat lo cap del PKK quand l'estat “ataca de civils e de gents sens defensa”. 15 activistas curds se jonhon a la cauma de la fam a Estrasborg (Alsàcia) per far pression sul Conselh d'Euròpa per que mande una delegacion del Comitat per la Prevencion de la Tortura a la preson ont es Öcalan.



A l'entorn de 500 presonièrs curds en Turquia anoncièron diluns passat que se jonhián a d'autres 1500 presonièrs, del Partit dels Trabalhadors de Curdistan (PKK) e del Partit per una Vida Liura en Curdistan (PJAK), en una cauma de la fam dempuèi 50 jorns. Protèstan per l'isolament que patís lo cap del PKK, Abdullah Öcalan, dins la preson d'Imrali, ont es empresonat a perpetuitat.

A Estrasburg (Alsàcia), d'autres 15 curds son tanben en cauma de la fam dempuèi lo 1r de març per demandar al Conselh d'Euròpa que mande una delegacion del Comitat per la Prevencion de la Tortura (CPT) a Imrali per que verifique la situacion d'Öcalan. 



En una peticion publica adreçada al president del Conselh d'Euròpa, Thorbjørn Jagland, los caumaires dison que dempuèi 2009 Turquia "a empresonat près de 9000 curds, qu'entre eles i a sièis deputats, 31 cònsols, 96 jornalistas, 36 avocats, 183 caps del Partit per la Patz e la Democracia (BDP), de sindicalistas, de defensors dels dreches umans, d'estudiants e près de 2000 enfants". Critican tanben lo fach qu'Öcalan siá estat mes "en un isolament total e sens precedents dempuèi lo 27 de julhet de 2011, en violant totas las leis internacionalas".

Qualques milièrs de curds manifestèron a Estrasborg al començament d'abril per sosténer aquelas demandas. 



Segon l'agéncia curda Firat News, los caumaires de la de fam dins las presons turcas acusan lo govèrn turc del Partit de la Justícia e del Desvolopament (AKP) de "finir pas las atacas contra lo nòstre cap [Öcalan] e contra las nòstras gents". Dison tanben que Turquia "a ensajat de far de tuadas massissas, a atacat de civils e de gents sens defensa de faiçon voraça".



Lo cap del PKK, Abdullah Öcalan, e lo partit BDP demandan pas un estat curd independent mas una solucion negociada al conflicte basada sus çò qu'eles apèlan "confederalisme democratic", es a dire, d'institucions politicas comunas pels airals curds de Turquia, Iran, Iraq e Siria sens qu'aqueles territòris se separen d'aqueles estats.


Per mai d'informacions:

— Alsace20: Kurdes en grève de la faim
— Kurdish Hunger Strike: Blòg sus la cauma de la fam

 
Aqueste article ven del jornal catalan Nationalia.cat, amb qui Jornalet a un acòrdi de cooperacion.


abonar los amics de Jornalet






 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Una mica bèstia, això de fotre al presó tanta gent, tant com injust, i si al líder kurd li fan veure la padrina, encara mes.
Si el Kurdistan es un País, quin mal hi ha en que sigui lliure o independent? Seria el mes natural, i es mes lo just.
Doncs es una injustícia!
Visca la Terra...Lliure!
L'Ernest, "El Tàrrega".

  • 0
  • 0

Escriu un comentari sus aqueste article