Lo jornal egipcian Al Watan a respondut sens violéncia a las caricaturas de Maomet. A decidit d’editar una seguida de tretze caricaturas entitoladas “Combat las vinhetas amb de vinhetas”, que denóncian l’estigmatizacion que creson que l’Occident fa del mond musulman.

Es estada la reaccion del jornal a las caricaturas de la revista francesa Charlie Hebdo. E lo messatge es fòrça clar: se vei de lunetas, amb l’imatge de las Tors Bessonas de Nòva York, que dison “De lunetas occidentalas pel mond islamic”. Tanben s’i pòt veire dos musulmans, un amb la mina pacifica, del temps que l’autre pòrta un cotèl a la man quand es alugat amb una lantèrna estatsunidenca.
 
“Eles nos insultan amb un dessenh, un article, una opinion. Perqué pas respondre en exprimissent lo nòstre vejaire?” çò a declarat lo director del jornal Muhammad Barghuti, qu’apondèt qu’“Al Watan es un jornal non religiós e fòrça critic amb lo partit dels Fraires Musulmans”.