Bandièra01 capçalera  1180x150: Novestivada

Actualitats

Ara fa 5 ans. “Toarègs, songais e puls se son jonches entièrament a l’MNLA per l’independéncia”



Mossa Ag Attaher, pòrtaparaula de l’organizacion independentista d’Azawad, ditz que los ligams regionals d’Al Qaida los cal cercar dins lo “trafec de drògas e dins l’Estat malian” e afirma que los toarègs son “lo sol mur contra l’islamisme dins lo país”

“Toarègs, songais e peuls se son jonches entièrament al MNLA per l'independéncia”  segon Mossa Ag Attaher
“Toarègs, songais e peuls se son jonches entièrament al MNLA per l'independéncia” segon Mossa Ag Attaher | Magharebia



“Çò qu’ara n’avèm mai de besonh es la reconeissença internacionala. Non mespresam cap de reconeissença, ni d’un estat ni d’una associacion”. Son de mots del pòrtaparaula del Movement de Liberacion Nacionala d’Azawad (MNLA), lo toarèg Mossa Ag Attaher, qu’es anat a Barcelona per portar lo discors de la siá organizacion independentista a la societat catalana. Lo 19 d’abril, Ag Attaher anèt a la sedença del CIEMEN (un centre d’estudi sus las nacions sens estat a Barcelona) per parlar amb lo mond de Nationalia, amb qui Jornalet a un acòrdi de cooperacion. Publicam aicí, doncas, qualques unas de las siás declaracions. 




Sul sosten popular a l’independéncia:


“La nòstra fòrça, dempuèi lo 6 d’abril [jorn de la declaracion d’independéncia d’Azawad], es que cada còp avèm mai sosten entre las nòstras gents, entre lo nòstre pòble.”

 
“Fa tres jorns, se faguèt una granda assemblada de la societat civila d’Azawad: de representants tribals e civics, d’associacions de femnas... E l’acòrdi general foguèt aquel de formar una vertadièra societat civila d’Azawad e refusar l’implantacion d’un estat islamic.” 


“Songais e puls [dos autres pòbles autoctòns d’Azawad] son estats a combatre amassa amb los toarègs per liberar Azawad. A Gao e Tomboctó se son jonches entièrament a l’MNLA. Es verai que Mali a creat de milícias armadas aràbias e songais per nos dividir, mas las relacions entre totes los pòbles d’Azawad son totjorn estadas armoniosas.” 



Sus Ansar Dinni, la milícia islamista toarèg:


“Son plan establits a Kidal, d’ont es originari lo clan del sieu cap, Iyad Ag Ghali. En març passat, Ansar Dinni nos avisèt que volián aplicar la sharia en tot Mali. Aquò o admetèm pas. Los toarègs sèm lo sol mur contra l’islamisme en aquela part del mond. Acceptarem jamai l’imposicion de la sharia ni que se redusiscan los dreches de las femnas.” 

Sul ròtle d’Al Qaida dins la region sahariana e saheliana: 

“Los caps del trafec de drògas a Gao son totes d’arabis ligats a Al Qaida del Magrèb Islamic (AQMI) e qu’èran a l’encòp de conselhièrs de l’èx-president Amadou Toumani Touré. Qui que siá de Gao vos pòt ensenhar los sieus ostals. Los Estats Units sabon qu’aquò arriba. Se volètz cercar de ligams amb AQMI, son pas dins l’MNLA mas dins l’Estat malian e dins lo trafec de drògas.” 



Sus una intervencion militara dels estats de l’entorn contra l’MNLA: 


“L’ECOWAS [organizacion regionala dels estats d’Africa occidentala que Mali ne fa partida] a dich que vòl restablir la democracia en Mali. Fòrt plan: caldrà mandar la siá armada a Bamako [la capitala de Mali], evitar que los militars prengan lo poder e i garentir lo retorn a la democracia. D’un autre costat, l’estat major de l’ECOWAS es fach a l’imatge de l’estat major de cadun dels estats membres: an pas cap de coneissença sus Azawad.” 



Sus las possibilitats economicas de l’Azawad independent



“Avèm de regions fòrça ricas en agricultura a Gao e Tomboctó, que jamai son estadas ajudadas per Mali. Sèm tanben un productor de carn notable. E, en mai d’aquò, avèm descobèrt de petròli qu’esplecharem d’un biais responsable e soscat, amb la tòca que contribuisca a la benestança de las nòvas generacions d’Azawad.” 


Azawad. Donadas generalas

  • Populacion: almens 1 300 000 abitants (donadas incompletas del cens de Mali, 2009)
  • Superfícia: 860 000 km² aperaquí (las frontièras son pas totalament definidas al sud)
  • 
Institucions: Govèrn de l’Estat Independent d’Azawad (pas reconegut per cap d’estat)
  • Vilas importantas: Tomboctó, Kidal, Gao
  • 
Administracion estatala: Azawad (de facto), Mali (de jure)
  • 
Lengas territorialas: berbèr (toarèg), pul, songai, arabi
  • 
Lengas oficialas: (sens cap de donada; s’es pas aprovada cap de Constitucion ni lei d’Azawad)
  • 
Cultura religiosa: islam sunnita


 
Aqueste article ven del jornal catalan Nationalia.cat, amb qui Jornalet a un acòrdi de cooperacion.


abonar los amics de Jornalet





 
Mossa Ag Attaher, pòrta-paraula de l'organizacion independentista d'Azawad, es anat a Barcelona per portar lo discors de la siá organizacion independentista a la societat catalana
Mossa Ag Attaher, pòrta-paraula de l'organizacion independentista d'Azawad, es anat a Barcelona per portar lo discors de la siá organizacion independentista a la societat catalana | Nationalia

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article