Bandièra01 1180x150: Comuna de Tolosa

Actualitats

Ara fa 5 ans. Chadenas umanas contra lo nuclear

Lo 26 d'abriu es la jornada internacionala de commemoracion de la catastròfa nucleara de Chornobyl

Cadena umana de Lion a Avinhon contra l'energia nucleara l'11 de març a Valença
Cadena umana de Lion a Avinhon contra l'energia nucleara l'11 de març a Valença | Rolf Krahl



Ujan, lo malhum Sortir du nucléaire apela a formar de las chadenas umanas de pertot en França.


Lo 11 de març passat, un an apres l'accident nuclear de Fukushima, los antinuclears avián reüssit a mobilizar pres de 60 000 personas per far una chadena umana entre Lion e Avinhon. Per l'anniversari de la catastròfa de Chornobyl, vòlen contunhar quela mobilizacion en esperar l'amplifiar e pesar sus lo debat politic entre los dos torns de l'eleccion presidenciala. Apelan a de las accions de pertot en França dau 26 au 29 d'abriu. Mai d'una centena son prevudas. Entau de las chadenas umanas se faràn notadament dins de las vilas occitanas (Aubenàs, Lo Puèi de Velai, Montpelhièr, Tolosa, Tula, Tolon, ...) e a l'entorn daus sits nuclears de Golfuèg e de Cadaracha.

Coma la jornada es internacionala, de las manifestacions se faràn tanben dins d'autres país. Entau, los ecologistas s'amassaràn davant lo ministeri japonés de l'Economia, dau Comerci e de l'Industria a Tòquio per demandar l'arrest dau nuclear dins l'archipel. Au Canadà demandaràn la barradura de la centrala de Darington sus lo lac Ontàrio. En Alemanha e en Àustria, se mobilizaràn contra las centralas nuclearas checas e slovacas, pròchas de la frontiera. Dins 9 autres país se debanaràn conferéncias, velhada emb de las bogias, projeccion de filmes. L'impacte de quelas mobilizacions sus la politica energetica mondiala, quitament apres dos accidents nuclears màgers, demòra mausegur.




Maime Caillon



abonar los amics de Jornalet


Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma
1.

Se cal amassar per reivindicar totes los coneissaments per far una energia mai ecològica e pas dangerosa.

  • 1
  • 0

Escriu un comentari sus aqueste article