Aquesta dimenjada de Pascas, se debanavan las semifinalas de la Copa Lord-Derby de XIII. Las finalas de la Copa Nitard dels juniòrs ASC-Lesinhan e de la Copa Lord Derby ASC-Pià se tendràn lo dimenge 20 de mai a Narbona que vendrà capitala tretzista.

Aquesta dimenjada de Pascas, se debanavan las semifinalas de la Copa Lord-Derby de XIII. E de derby n’èra plan question dissabte al Molin de Lesinhan amb la confrontacion entre l’AS Carcassona e Limós que dintrèt ambe plan de vam per ensajar de salvar sa sason. E de fait, los Roge en Negre prenguèron d’iniciativas long del primièr temps, mas un ensag a la còrna del tresena linha canarí remandava las equipas al vestiari amb la marca de 16 pertot al planchòt. Dins lo segond temps, lo trabalh dels avants mai fòrts e lo banc mai experimentat de Carcassona acabèron per pagar. Aquò se concretizèt per tres novèls ensags e una victòria 36 a 22.

Dimenge, a Limós, lo tenent, Lesinhan vegèt pas lo solelh de la partida. Menats per un parelh de mièges que joguèron totjorn juste, los Verd e Roge de Salanca prenguèron lèu lo pas sus una formacion que foguèt jamai dins lo còp. Los Singlars de Corbièras, sens èime, trigocèron lor pena long de las 80 minutas: menats 24 a 6, perdèron fin finala 38 a 6.

Las finalas de la Copa Nitard dels juniòrs ASC-Lesinhan e de la Copa Lord Derby ASC-Pià se tendràn lo dimenge 20 de mai a Narbona que vendrà capitala tretzista, vist que s’i debanarà tanben la finala del campionat lo dissabte 12 de mai!

Diluns, en Super-Liga, se vegèt la mai granda afluéncia a l’estadi Brutús (Perpinhan): 11 526 espectators que s’arregalèron del vam e del jòc dels Dracs que s’impausèron 44-16 fàcia als Lops de Warrington.

Alan Roch