Bandièra01 1180x150: Comuna de Tolosa

Actualitats

Lo Parlament Europèu demandarà d’aplicar l’article 7 contra Ongria

Los tractats europèus preveson de sancions contra los païses que s’escarten de las valors democraticas

Lo Parlament Europèu demandarà l’aplicacion de l’article 7 contra Ongria, per s’èsser escartada de las valors democraticas europèas. Se i presentarà una mocion amb lo sosten dels grops socialista, liberal, Verds-Aliança Liura e Esquèrra Unida. Qualques membres del Partit Popular Europèu, que i aperten lo partit que govèrna en Ongria, lo Fidesz, an anonciat que votarián tanben en favor.
 
L’aplicacion de l’article 7 deu èsser aprovada pel Conselh Europèu e implicariá de sancions contra Ongria, que, a mai, perdriá los dreches de vòte. L’article 7 es una clausula del tractat que permet de salvagardar los dreches democratics s’un estat membre de l’Union Europèa los menaça. E mai se s’èra ja parlat, de còps que i a, d’aplicar aquel article, per ara s’es pas jamai aplicat.
 
Lo govèrn d’Ongria es observat dempuèi longtemps per Brussèlas a causa de sa deriva totalitària que menaça los dreches fondamentals de sos ciutadans. Fa pas gaire, aprovèt una lei sus las universitats que pòt obligar de barrar l’Universitat Centrala Europèa de Budapèst, çò qu’indignèt lo parlament. Lo govèrn ongrés acusa aquela universitat de far “d’activitats politicas”. S’agís d’una universitat privada fòrça prestigiosa finançada per Georges Soros, que s’es totjorn distinguida per sa libertat academica. 

 
 
abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article