Bandièra01 1180x150: Comuna de Tolosa

Actualitats

L’armada egipciana bombarda de “basas terroristas” en Libia mentre que lo jihadisme se consolida en Egipte

L’estrategia dels jihadistas es de provocar de tensions entre las diferentas confessions musulmanas per s’atraire lo sosten de la comunautat sunnita

| Joumana Gebara
L’armada egipciana bombardèt divendres de “camps d’entraïnament terrorista” en Libia en responsa a l’ataca contra un autobús que menava de crestians còptes, çò que tuèt 28 personas. Segon la television publica d’Egipte, la fòrça aeriana de l’armada ataquèt sièis sits ont presumidament s’entraïnan de jihadistas fisèls a l’autoproclamat Estat Islamic (EI).
 
Qualques minutas abans l’ataca militara, lo president Abd Al Fattah Al Sisi aviá anonciat qu’agarririá las basas dels jihadistas en Egipte e endacòm mai. “Egipte trantalharà pas per atacar los camps d’entraïnament dels terroristas pertot, dins son territòri e a l’estrange”.
 
 
Wilaya Sina, la seccion egipciana de l’Estat Islamic
 
Dempuèi 2014, l’EI ten una filiala en Egipte nomenada Wilaya Sina (Província de Sinai). Son installats en Sinai, una peninsula desertica e luènha, mas après los darrièrs chaples contra los crestians còptes, an demostrat qu’an la capacitat d’agir dins la val de Nil.
 
Segon d’analistas, la filiala egipciana de l’EI aplica l’estrategia de l’organizacion terrorista en Siria e Iraq, es a dire provocar de tensions entre las diferentas confessions musulmanas per s’atraire lo sosten de la comunautat sunnita, mai que mai los pus pròches del wahhabisme.
 
Egipte a totjorn patit de tensions entre crestians còptes e musulmans, mas la violéncia dels darrièrs meses es inedita. “Amb Al Sisi, l’estat pèrd la capacitat de governar lo país, quitament dins lo domeni de la seguretat. Los grops terroristas son a cada còp pus fòrts e capables de perpetrar d’atemptats pus murtrièrs”, çò ditz lo politològ egipcian Amr Hamzawy, segon çò que rapòrta Ara.
 
Egipte es dins una espirala de violéncia après lo còp d’estat de 2013, que metèt Al Sisi al poder en tot metre fin a dos ans de transicion vèrs la democracia. Dempuèi alara lo país subís una dictatura militara qu’aumenta la repression contra totes los dissidents, mentre que s’estend e se consolida una persistenta insurreccion islamista.
 
 
Qu’es lo wahhabisme?
 
Lo wahhabisme (de l’arabi  الوهابية‎, al wahhābiyya) es un movement fondamentalista qu’es vengut lo sistèma sòciopolitic oficial en vigor en Arabia Saudita. S’agís d’un sistèma religiós extrèmament rigorista, a causa de la cresença del sieu fondador que tot çò qu’apareguèt dins l’islam après las tres primièras generacions a partir del profèta èra innovator e corrompiá la fe. Per tant lo wahhabisme preconiza d’utilizar sonque lo Coran e los Hadits coma font de la religion, e prescindir de tota autra nocion que siá aportada per la tradicion. Se caracteriza tanben per sa volontat d’espandiment e, a l’ora d’ara, a estendut considerablament son influéncia amb la creacion de centres d’estudis e de mosquetas per tot lo Mond, finançats amb l’ajuda de las ressorsas economicas de la dinastia saudita. Tant Al Qaida coma lo pretengut Estat Islamic posan lor font ideologica dins lo wahhabisme, que se coneis tanben jol nom de “salafisme saudita”.
 
 
 
abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Ben fait. Dau-los fort.

  • 2
  • 0
Lo Cagadiu
2.

Tà jo l’islamisme risca pas d’atacar la mia religion que non n’èi pas nada.
S’ataca sustot a las libertats, en tèrra d’islam com pertot. Véder l’exemple d’Iran on los joens e n’an ua harterassa que tot e sii defenut. Alavetz qu’ac hèn tot e rai deu dangèr: drògas, alcoòl, sèxe libre, orgias (dangèr sanitari e dangèr de la polícia morau). Que son la generacion qui arriba e que cau esperar que peneràn tot aqueth trastumi de beateria au higuèr.
Tà çò deu monde arabe que serà mei complicat, que los reformators e los libertaris s’i poirén comptar suus artelhs d’un lairon recidivista.

  • 4
  • 0
écr.l\\\\\\\'inf. (Voltaire)
1.

l'islamismeà la conquesta dau mond s'ataca à nostra religion de l'espectacle e dei glèisas vuejas a Manchester e an aquela dei coptes e dei glèisas plenas en Egipte. lo jornalet sembla pensar que amb lei fraires musulmans li auriá agut dos ans de transicion vers la democracia e que la dictatura militària d'Al Sissi seriá responsablo, ara, dau terrorisme daumens que s'atrobam davant un processùs analog an aqueu d'Argeria,en 1989 onte lo FIS islamica aguent ganhar democraticament leis eleccions lo FLN contra-ataquèt subran e feniguèt per ganhar la guerra civil onte massacres e tuariás foguèron nombros. Curiosament, se parla pas gaire de la dictatura a pena dissimulada dau FLN; per quant a l'Arabia saodita que 9 dei 10 terroristas pilots d'avion que se mandèron contra lei torres bessonas de New York n'èran originaris ,leis USA amb una logica amirable, seguit per toti leis estats europencs,per represalhas envaïguèron l'Afganistan e non pas l'Arabia saodita, breç dau walhabisme, d'onte proven tot lo mau, coma seriá estat la bona ripôsta.

  • 6
  • 2

Escriu un comentari sus aqueste article