Bandièra01 1180x150: Comuna de Tolosa

Actualitats

Catalonha e Aran: lo referendum d’independéncia aurà luòc lo 1r d’octòbre que ven

La question se pausarà en catalan, espanhòl e occitan, e se demandarà s’òm vòl “un estat independent jos forma de republica”, çò a anonciat lo president catalan, Carles Puigdemont

Lo moment de l'anóncia
Lo moment de l'anóncia | Rubén Moreno
Lo referendum sus l’independéncia de Catalonha e Aran se tendrà lo 1r d’octòbre que ven. O anoncièt ièr de matin lo president de la Generalitat de Catalonha, Carles Puigdemont, acompanhat del vicepresident, Oriol Junqueras, e dels deputats independendistas del Parlament de Catalonha. La question que se pausarà —en catalan, espanhòl e occitan— serà: “Volètz que Catalonha siá un estat independent jos forma de republica?”. La responsa serà binària, “òc” o “non”.
 


Segon Puigdemont, lo vòte serà inalienable. “La responsa que donen los nòstres conciutadans jos forma de “òc” o de “non” serà un mandat qu’aqueste govèrn s’engatja a aplicar. Es als catalans de decidir lor avenir; es entre lors mans e las de nosautres totes de o far possible, de demostrar que la democracia nos amassa per dessús de las legitimas e sanas discordàncias que caracterizan tota societat madura e frairala que sap prene de decisions ela meteissa, e que sap respectar totas las opcions de responsa”.
 
En mai d’aquò, Puigdemont anoncièt que lo govèrn catalan s’engatjava a velhar per que lo referendum tenguèsse totas las garentidas democraticas, e cridèt los ciutadans a assumir collectivament aquel drech.
 
Puigdemont recordèt totes los ensages faches per negociar un acòrdi amb l’estat, e los milanta refuses de las nombrosas proposicions dels catalans per resòlvre lo conflicte politic.
 
 
 
Reaccion de l’estat espanhòl: “I aurà de consequéncias”
 
En seguida, lo pòrtavotz del govèrn espanhòl, Íñigo Méndez de Vigo, diguèt que “lo referendum es illegal” e afirmèt que se fariá pas. Lo govèrn espanhòl rèsta a far pas res, fins que se “passe de l’accion als faches”, en aquel moment “i aurà de consequéncias”, çò menacèt.
 
En mai d’aquò, lo procuraire general de l’estat, José Manuel Maza, menacèt los foncionaris que poirián far venir possible lo vòte: “Se quand arribarà lo moment, los faches aconselhan que lo ministèri public agisca, doncas, amb tota energia e en defensa de la legalitat, en aquel moment nos prononciarem”, çò diguèt.

 



abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ct
4.

#1 I a tres lengas oficialas dins tot lo Principat de Catalunya

  • 4
  • 0
Roser
3.

1: és la mateixa a tot arreu.

  • 9
  • 1
Artur
2.

Paraula, paraula! A véder se aqueth referendum se tierà de fèit o si n'ei pas sonque un efèit d'anonci, un de mei. Qu'èm acostumats aus vertadèrs-faus referéndums catalans. .

  • 4
  • 12
lo curat Meslier
1.

vodriáu saubre se lo butletin de vota que nos mostratz çai-subre serà aqueu pèr tota Catalonha o bèn se lo faràn servir socament per la val d'Aran ?

  • 5
  • 0

Escriu un comentari sus aqueste article