Bandièra01 1180x150: Comuna de Tolosa

Actualitats

Divendres que ven, serem al CIRDÒC amb los que fan l’actualitat en occitan

La mediatèca occitana de Besièrs prepausa una granda serada a l’entorn dels mèdias occitans a l’escasença dels 5 ans de Jornalet

| Guillem Sevilla
Lo CIRDÒC aculhirà divendres que ven la fèsta del cinquen anniversari de Jornalet amb un rescontre dels jornalistas que fan l’actualitat en occitan al sègle XXI e una animacion musicala.
 
Tre 18h30, los jornalistas Ferriol Macip (Jornalet), Fanny Lartigot (La Setmana), Marius Blenet (Ràdio Lenga d'Òc Montpelhièr) e Guillaume Gratiolet (jornalista de ràdio) escambiaràn sul ròtle dels mèdias occitans dins lo mond de la premsa actual, de las formas que prenon aqueles mèdias e dels enjòcs que ne son portaires. Aquel rencontre public organizat per la mediatèca occitana aurà per tòca de promòure las riquesas mas tanben de metre endavant las fragilitats dels mèdias professionals d'expression occitana.
 
En seguida d’aquel debat se tendrà la cinquena “assemblada dels legeires de Jornalet” d’ongan dins l’encastre de la celebracion dels cinc ans d’aqueste mèdia, nascut lo 31 de març de 2012. Se tracta d’una reünion dobèrta ont lo redactor en cap d’aqueste jornal en linha explicarà son trabalh de cada jorn, lo foncionament del mèdia, e escotarà totas las opinions dels legeires que participen a l’assemblada. La tòca es de metre en comun d’idèas e d’avises e de marcar la linha de seguir.
 
La serada s'acabarà en musica amb lo grop catalan Ballaveu qu'animarà l'aperitiu musical que clavarà aquel projècte sul drech d'informar dins la lenga del país. Es l’escasença de dançar sus de ritmes occitans e tanben catalans.
 
 
Tota una annada de celebracions
 
Ongan, la còla de Jornalet vòl plan festejar son cinquen anniversari. Per ansin, avèm previstas divèrsas assembladas de legeires de Jornalet a travèrs d'Occitània tota per tal de nos rescontrar, conversar, nos conéisser personalament, amassar d’idèas, de suggestions, de proposicions de melhorament e tot çò que caldrà per far en sòrta que Jornalet siá un jornal de totes e per totes.
 
Sèm conscients que lo prètzfach es grand e que las ressorsas son escarsas, mas esperam de rompre los clichats e los complèxes amb l’ajuda de totes. Sèm pas perfièches e es plan segur que fasèm d’errors. Esperam alavetz que nos ajudetz a nos melhorar amb vòstres comentaris, criticas e contribucions. Fasètz-vos vòstre lo Jornalet perque lo Jornalet es de totes.
 
 
E puèi a Barcelona amb Kaj Tiel Plu e Goulamas-K
 
La primièra assemblada de legeires de Jornalet d’ongan se tenguèt a Carcassona l’8 de febrièr passat, puèi lo 24 de març a Marselha e lo 27 d’abril a Barcelona, ont se presentèt lo modèl de lenga del jornal e l’elaboracion de son libre d’estil. Seguiguèt un rescontre a l’Ostal Occitan de Narbona lo 18 de mai.
 
Enfin, lo 1r de julhet, se tendrà a Barcelona una fèsta occitana amb un balèti occitan menat per Kaj Tiel Plu, e un concertàs de Goulamas-K.
 
 
Convidatz-nos a venir en çò vòstre
 
En mai d’aquò, voldriam èsser presents per Occitània tota, de Medoc a Ròia e d’Aran a Borbonés. Fasèm doncas una crida a totes los que vòlgan organizar una assemblada de legeires de Jornalet. Solament cal organizar un rescontre, e s’es possible amb una velhada, e nos ofrir un lièch per dormir una nuèch. Escrivètz a info(a)jornalet.com e nos metrem d’acòrdi  pel luòc e la data.
 
 
Los que fan l’actu en occitan al sègle XXI
Divendres 16 de junh 2017
— 18h30 Debat amb los mèdias occitans d’uèi
— 20h00 5 ans del Jornalet, aquò se festeja
Informacions e inscripcions: secretariat(a)cirdoc.fr / +33(0)4 67 11 85 10.
 
 
 
Editorial del 1r de genièr: 2017: tota una annada per festejar lo cinquen anniversari de Jornalet.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ouxita
4.

#3 Quiò, qu'avetz rason, qu'ei gascona Fanny Lartigot, mes lo jornau La Setmana ne representa pas vertadèrament un mèdia de Gasonha, quan i serà basat. Que i a un pauc de tot, o quasi, dehens. Que'm hè dòu qui n'aja pas mei de representatitivat occitana ad aqueth eveniment, qu'ei tot...

  • 6
  • 5
Matieu
3.

#2 Parlatz d'una organizacion lengadociana. Pr'aquò, es pas gascona Fanny Lartigot ? La Setmana es pas facha a Pau ? Aquel jornal fa d'articles en gascon, lengadocian e tanben en provençal o lemosin tot còp.
Lo problèma es endacòm mai per ieu: es pas un afar de lengadocian o d'Occitània reducha. I a quicòm que truca perque i a pas cap de convidat de França Blau o de França 3 (levat per Marius Blenet mas intervendrà amb lo capèl de Ràdio Lenga d'Òc Montpelhièr). Perqué los aver pas convidats ? Perqué i a pas degun de la còla de Vaquí ? Perqué i a pas Joan-Pau Verdièr per exemple ? Cal quitar de s'agachar l'embonilh.

  • 7
  • 1
ouxita
2.

Los mèdias occitans ? Nada representativitat occitana! Provença, Gasconha, OCtele, e los autes, on son? E son estats convidats ? E tribalha en quina redaccion Guillaume Gratiolet ?
Enqüèra ua organizacion lengadociana qui estrema los autes. Aquò muisha on ei l'embarrament vertadèr ! Prauba occitania...

Per çò qui ei de la celebracion deu Jornalet totun, òsca pr'amor que hètz un bèth tribalh. E podosse durar.

  • 7
  • 6
Melania Besièrs
1.

òsca ! i serai ! :)

  • 8
  • 0

Escriu un comentari sus aqueste article