Bandièra01 capçalera  1180x150: Novestivada

Actualitats

La revòlta del Rif se revira en violéncia après una dura repression de la polícia

Dempuèi sèt meses, Taghzut es lo centre d’una cauma generala e de manifestacions que revendican de melhoraments dins l’educacion, la santat e l’emplec

Après sèt meses de revòlta e de manifestacions, la situacion del Rif a viscut una revirada aquesta dimenjada passada. Aqueste còp, la polícia a dissolgut los rassemblaments que se tenián dins divèrsas vilas del país amb una violéncia extrèma. Taghzut, tanben coneguda per son nom arabi Al Hoceima, a viscut de fòrts combats entre manifestants e policièrs.
 
Per festejar la fin del Ramadan, avián cridat a manifestar per reclamar la liberacion dels detenguts de la revòlta populara del Rif. La polícia installèt de barricadas a las intradas de la vila per empedir que i arribèsson de mond d’autras vilas, e carguèt amb fòrça duretat contra los manifestants. Son a virar suls rets socialas de vidèos que mòstran la repression del govèrn de Marròc.
 
Dempuèi sèt meses, Taghzut es lo centre d’una cauma generala e de manifestacions. Las protèstas seguisson la crida del Movement Popular (Amussu agherfan en berbèr o Hirak chaabi en arabi) e tenon totjorn un caire social. Denóncian la seculara marginalizacion economica que la patís lo país del Rif, estofat pel govèrn de Marròc, e revendican de melhoraments dins l’educacion, la santat e l’emplec.
 
 
 

 

 
 
La mòrt d’un jove peissonièr a l’origina de la revòlta
 
Aquela sòrta de manifestacions massissas son pas brica abitualas en Marròc. De tot biais, en 2011, lo Movement 20 de Febrièr ocupèt ja las carrièras per exigir de reformas democraticas dins l’encastre de la prima aràbia. En seguida, lo govèrn de Marròc entamenèt una tièra de reformas politicas limitadas, un aument de las despensas publicas e una politica de seguretat mai dura.
 
Dins aquel encastre de malcontentament social, la mòrt Mouchine Fikri en octòbre passat descadenèt l’indignacion qu’a menat a la revòlta del Rif. Fikri èra un jove peissonièr de la vila que moriguèt esclafat dins un camion d’acampatge de bordilhas quand ensajava de recuperar lo peis que la polícia li aviá confiscat. Tanlèu coneguts los faches, se convoquèt de mobilizacions pels rets socials per protestar contra aquel hogra, çò es lo mesprètz de las autoritats.
 
 
Nawal Benaissa, una femna de 36 ans
 
L’8 de junh passat, la polícia de Marròc arrestèt Nawal Benaissa, una femna de 36 ans e maire de quatre enfants qu’èra venguda la pòrtavotz de la revòlta del Rif après la detencion de Nasser Zefzafi e d’almens autres 22 activistas. Tre que comencèt lo periòde del Ramadan, cada ser, après rompre lo june, Nawal Benaissa preniá lo nautparlador e rescontrava la molonada acampada dins lo quartièr Sidi Abed de Taghzut, una vila berberofòna del Rif coneguda per son nom arabi Al Hoceima, que dempuèi octòbre de 2016 es lo quadre de la revòlta sociala. La Plaça de Muhammad VI es pas pus lo centre de las protèstas tre qu’es presa pels policièrs antisusmautas.
 
 
Lo govèrn de Marroc ditz que “cal escotar” las revendicacions, mas acusa a l’encòp los manifestants de seguir “d’agendas estrangièras” e de fomentar “lo separatisme”.
 
Abans d’èsser detengut, Nasser Zefzafi disiá a Le Monde que la mobilizacion unissiá lo pòble del Rif. Lo que foguèt lo cap del Movement Popular precisava que “las bandièras rifencas e amazighs [èran] abitualas dins las protèstas”, del temps que recordava qu’aquel país montanhòl berberofòn recebiá pas “lo meteis tractament que la rèsta de Marròc”. En mai d’aquò, assegurava que las femnas avián un “ròtle clau” dins las mobilizacions car la majoritat dels caumaires son de femnas.
 
 
La participacion de las femnas
 
De fach, just après la detencion de Zefzafi, es una femna que prenguèt son ròtle: Nawal Benissa. Abans d’èsser arrestada l’8 de junh passat, Benaissa explicava net e clar lo ròtle de las femnas dins aquela revòlta:
 
“La participacion de las femnas dins lo movement es totjorn estada omnipresenta, mas après las arrestacions dels activistas comesas per l’Estat, las femnas an vencut lor paur, car elas avián pas paur d’una autra causa que de sortir per carrièras per sosténer lors enfants, lor marit, lor paire, e reclamar lor liberacion. Las femnas an vist que lor preséncia èra importanta e elas sortiràn fins que se libèren nòstres detenguts e fins que se responda a nòstras revendicacions”.
 
De fach, e mai s’aquel país es reputat conservator, las femnas son aitan concernidas coma los òmes, e lor ròtle es clau dins una situacion de sèt meses de protèstas e de cauma generala.
 
 
Arrestacion de Zefzafi
 
Nasser Zefzafi lo detenguèron lo 29 de mai passat en l’embarrant durant qualques jorns dins un endrech desconegut. Lo govèrn de Marròc l’acusa d’una “presumida obstruccion a la libertat de culte” per aver interromput lo sermon de l’imam de la mosqueta de son quartièr. Zefzafi aviá interromput lo parladís de l’imam quand comencèt de criticar las protèstas.
 
Las autoritats avián ensajat de l’arrestar qualques jorns abans, mas de desenats de joves anèron a son ostal per o empedir. Fin finala, l’arrestèron e risca una condemna de tres ans de preson, que poirián aumentar fòrça car l’estat l’acusa tanben de desobesissença e d’insurreccion armada.
 
Al meteis temps la polícia arrestèt d’autras 22 personas, e mai se las organizacions pels dreches umans raportavan 37 detenguts aquel jorn. Amb totas aquelas arrestacions, Rabat ensaja de copar lo cap del movement, mas sembla que fa pas res per apasimar la basa dels indignats.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
2.

Tens raó en això Francesc les tv de l'estat son molt falses, però la gent les escolta, perquè? No ho se!
Ara gent del Marroc la solució no es troturar, ni matar, sinó parlar, dialogar i cercar acords.
Sinó passa el que passa, uns tenen raó, i d'altres no, i així no hi ha diàleg, recapaciteu autoritats, així no
hi ha solució.
Visca la Terra...Lliure!
L'Ernest, "El Tàrrega".

  • 0
  • 0
francesc palma
1.

E los medias TVE,TV3, e tots los canals d'Espanha no diuen pas res. Aquò es sa dictadura informativa de las dretas.

  • 3
  • 0

Escriu un comentari sus aqueste article