Bandièra01 1180x150: Comuna de Tolosa

Actualitats

La Corèa del Nòrd a ensajat un nòu missil qu’a chepicat los païses vesins

E mai afirmen qu’èra un missil intercontinental, e los Estats Units crengan qu’atenga Alaska, Russia ditz que s’agís d’un projectil de portada mejana

Un nòu ensag militar de la Corèa del Nòrd a chepicat qualques païses. Dins la matinada de diluns a dimars aurián lançat un missil intercontinental qu’arribèt dins la mar de Japon.  La fusada volèt trenta nòu minutas e atenguèt una nautor de 2800 mètres.
 
Segon la television nòrd-coreana, s’agís d’un missil Hwasong-14, de portada intercontinentala qu’an lançat amb un suènh maximal e qu’a pas agut cap d’efièch negatiu pels païses vesins. De son costat, lo govèrn rus assegura dins un comunicat que s'agís d'un projectil de portada mejana, segon “los paramètres de vòl”. Totun, segon qualques expèrts estatsunidencs, lo projectil poiriá arribar fins a Alaska.
 
 
De protèstas dels estats de l’entorn
 
Tant Japon coma la Corèa del Sud an protestat per aquel nòu ensag que Gim Jeongeun (Kim Jong-un) a fach qualques jorns après la reünion que lo nòu president sud-corean e Donard Trump tenguèron a Washington.
 
Mentretant China, de l’ÒNU estant, insistís al près dels coreans e dels estatsunidencs per que cèrquen un engatjament per rebaissar las tensions, e evitar que la situacion actuala pòsca aver de consequéncias desastrosas.
 
De son costat, lo president dels Estats Units a reagit sus Twitter, coma d’abitud. Trump s’es demandat “s’aquel tipe", en fasent referéncia a Gim Jeongeun, “a pas res melhor de far amb sa vida”, en tot ajustar que per el “es complicat de creire que la Corèa del Sud e Japon o pòscan suportar mai de temps aital. Benlèu China farà quicòm per metre fin de bon a aquela neciesa”.
 
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Los chinesses han una paciència e perseverància enorma, aconseguiran ser los primiers del mond en tot.

  • 1
  • 0

Escriu un comentari sus aqueste article