Bandièra01 1180x150: Comuna de Tolosa

Actualitats

Argelièrs: festejaràn dimenge lo 110n anniversari de la Revòlta dels Vinhairons

Lo Cafè de Marcelin Albèrt tornarà dobrir per aculhir una jornada amb un programa excepcional

| Cafè Marcelin Albèrt
Lo Cafè de Marcelin Albèrt, que se tròba a Argelièrs (Menerbés), aculhirà aqueste dimenge 16 de julhet la celebracion del 110n anniversari de la Revòlta dels Vinhairons amb un programa especial compausat d’un jòc radiofonic, de conferéncias, de projeccions, de musica, de literatura, una exposicion...
 
A 17h00 Ràdio Lenga d’òc animarà sus plaça un jòc radiofonic que serà retransmés sul canal 95.5 de l’antena radiofonica, un jòc en directe. Animat per Jackie Bonnet, lo jòc tractarà lo tèma del vin e de la civilizacion de la vinha lengadociana, e i a de lòts per ganhar.
 
A partir de 18h00 s’inaugurarà una exposicion efemèra de 4 retraches signats per Marcelin Albert. S’agís de tablèus de grand format inedits qu’apertenon a de colleccions privadas e seràn expausats solament entre 18h00 e 18h30.
 
A 18h30 se presentarà oficialament lo libre 1907 -L'Âme terrienne de Jules Rivals, un testimòni privilegiat de la Revòlta de 1907. L’istorian Jean Sagnes, especialista d’aquela revòlta lengadociana, es lo qu’a menat a bon tèrme l’edicion e ne farà la presentacion del temps qu’Alan Roch —l’òme del rugbi de XIII de Jornalet— ne legirà qualques passatges.
 
Enfin, après un aperitiu a 19h00 acompanhat d’una corala e una fanfara, se servirà lo sopar a 20h30 e a 22h se debanarà un espectacle amb la projeccion d’imatges animats a l’entorn d’Argelièrs al començament del sègle XXn.
 
 

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article