Bandièra01 1180x150: Comuna de Tolosa

Actualitats

Rugbi de XIII: plaça a la Copa del Mond de XIII-cadieral

Roman Navarette e Lewis Tierney en renfòrt per la fin de sason dels Dragons catalans joguèron tre dimenge a Saint Helens
Roman Navarette e Lewis Tierney en renfòrt per la fin de sason dels Dragons catalans joguèron tre dimenge a Saint Helens
En Austràlia, Queensland es demorat lo mèstre; en Euròpa, es la fin de la sason regulara en Superliga e en Championship amb fòrça decepcions costat catalan e costat tolosan. Mas, al país, l’eveniment bèl de la quinzenada serà lo debanament de la Copa del Mond de XIII-cadieral.
 
 
Queensland senhoreja
 
Dimècres, la tresena partida dels Estats d’Origina èra decisiva per conéisser lo venceire de la tièra de 2017. Mas de fait, a Brisbana, se vegèt una sola formacion sus la pelena: Queensland que marquèt 4 ensages (3 per son alièr Holmes) per gardar aisidament 22-6 lo trofèu.
 
 
Cap “los 8 del Mitan” pels Dragons
 
Per lor avantdarnièra partida de la sason regulara, los Dragons jogavan dimenge a St Helens: los Sants s’envolèron en fin de partida amb tres ensages dins las darrièras 6 minutas: 46-28.
 
Dissabte, reçaupràn lo cap de fila Castleford a Brutus.
 
En vista dels 8 del mitan (los darrièrs 4 de Superliga: Dragons, Warrington, Leigh e Widnes; los primièrs 4 de Championship: Hull KR, Londres, Featherstone, Halifax), per servar lor plaça en Superliga, los Dragons se son refortits amb dos jogaires de Wigan: Roman Navarette de retorn jol malhòt sang e aur de l’alièr Lewis Tierney, lo filh del legendari Jason Robinson.
 
Tre divendres, las desfaitas de Leigh a Huddersfield (26-4) e de Widnes fàcia a Wakefield (36-8) asseguravan la 10a plaça al classament dels catalans que s’acompanha de 4 recepcions a Brutus per 3 desplaçaments per aqueste 8 del mitan.
 
Las autras resultas: Warrington anèt ganhar dijòus a Wigan: 16-10; divendres, Castleford batèt Salford 38-14 e Leeds se deguèt emplegar per gardar l’avantatge sus Hull FC: 10-7.
 
En Championship, lo Tolosa Olimpic se permet d’anar batre lo cap de fila Hull KR: 31-30, mas la victòria d’Halifax a Featherstone los daissa a la cinquena plaça abans justament la recepcion d’aqueles segonds Featherstone, dissabte a Blanhac.
 
 
Debuta de la Copa del Mond de XIII-cadieral
 
L’eveniment rugbistic de la setmana en Occitània serà la debuta de la Copa del Mond de XIII-cadieral amb los rescontres amicals Itàlia-Espanha (15h) e França-Austràlia (19h) aqueste dimars 18 a Limós, puèi la primièra jornada a Carcassona dijòus 20 amb las oposicions Austràlia-Galas (14h), Itàlia-Escòcia (16h30) e França-Anglatèrra (20h30) sens doblidar la ceremònia oficiala de dobertura (19 h) e l’aprèp-partidas amb un sopar dobèrt a totòm (inscripcions: secretariat de l’ASC 13: +33(0)04 68 47 74 74; asc13(a)orange.fr).
 
L’espròva se perseguirà dissabte 22 a Pàmias amb las oposicions Galas-Anglatèrra (14h), Espanha-Itàlia (16h30) e França-Austràlia (20h45) abans la tresena jornada a Sant Jòri (diluns 24), los ¼ de finala a Albi (dimars 25); las mièjas finalas a Tolosa (dimècres 26), las partidas de classament a Sant Orens (dijòus 27) e la finala al Pargue de las Exposicions de Perpinhan lo divendres 28 (19h).
 
Las règlas del XIII-cadieral foguèron establidas per Robèrt Fassolette, coma una transposicion de las règlas de XIII per un spòrt andicapat (mas i pòt aver de valids dins las esquipas).
 
Se jòga sus un terren d’andbòl (40x20 m; en-but de 2,50 m). Cinc jogaires son sul terren; 5 remplaçants completan las formacions. Cada jogaire ten de bendas de vèlcro estacadas al braç: lo placatge se remplaça per l’arrancar d’una banda. Las règlas del nombre de tenguts s’aplica coma al XIII; lo jòc “al pè” es remplaçat per un còp de punh balhat dins la palma (talha 4, un bricon desconflada). La pauma en tòca es fisada a l’esquipa que n’es pas responsabla. Las partidas duran dos còps 40 minutas. En mai dels sonhaires, un mecanician es aquí amb son jòc de claus per parar a totes los incidents mecanics. Un espòrt de nauta intensitat de descobrir!
 
La formacion blava ganhèt la competicion en 2013 en Anglatèrra, mas perdèt contra eles en Copa d’Euròpa en 2015. A priòri, las 2 formacions europèas se deurián tornar trapar en finala lo 28 a Perpinhan.
 
 
 
 
Alan Roch

 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\'Alan Roch Carcassona
1.

Las Blaus entament plan la competicion : victoria 71-31 fàcia als Angleses.

  • 1
  • 0

Escriu un comentari sus aqueste article