Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Los musèus de la Val d’Aran prepausan una tièra d’activitats fins al 10 de setembre

Durant la sason estivala, los divèrses musèus araneses prepausan de vesitas guidadas e quitament teatralizadas e d’animacions divèrsas

| Conselh General d\'Aran
Lo 10 de julhet, comencèt la sason d’activitats d’estiu dels musèus de la Val d’Aran, que prepausa entrò lo 10 de setembre una tièra d’activitats remarcablas per totes los que voldràn far un sojorn cultural en occitan dins lo país de cap de Garona.
 
D’un costat, los musèus dobrisson lors pòrtas totes los jorns de las setmana, e qualques unes se pòden vesitar amb guidatge. Tanben se tenon de vesitas guidadas del diluns al dissabte dins totas las glèisas de la rota romanica. Mas la novetat pus remarcabla son las vesitas teatralizadas a l’ecòmusèu Çò de Joanchiquet de Vilamòs, un ostal tradicional aranés servat exactament tal e coma se trobava al començament del sègle XX e que mòstra la vida dels ostals araneses entre los sègles XVII e XVIII.
 
 
Las glèisas de la rota romanica
 
Del diluns al divendres a 11h, 12h, 13h, 17h, 18h, e 19h se pòt vesitar las glèisas de la rota romanica d’Ara que son: Santa Maria d’Arties, Santa Maria de Cap d’Aran deTredòs, Santa Eulària d’Unha, Sant Fèlix de Vilac, Sant Estève de Betren, Sant Fèlix de Bagergue e Sant Pèir d’Escunhau.
 
 
Los musèus
 
Durant totes los jorns obrants de la setmana, se pòt vesitar amb guidatge la Mina Victòria de Vilamòs entre 11h e 15h, la Mòla de Salardú (a 11h, 12h e 13h) e la Fabrica dera Lan de Vielha (a 17h, 18h e 19h). En mai d’aquò, lo Musèu de la Val d’Aran de Vielha, qu’es dobèrt tota la jornada, prepausa de vesitas guidadas a l’exposicion permanenta totes los diluns d’agost a 11h30.
 
E mai, la glèisa de Sant Joan d’Arties, qu’aculhís constantament d’exposicions, prepausa dos obradors nomenats “Nhacs artistics” pel public familiar, mai que mai pels enfants, lo 21 de julhet, lo 4 d’agost e lo 18 d’agost a 18h.
 
 
De vesitas teatralizadas en çò de Joanchiquet
 
Totun, la novetat mai remarcabla d’aquesta sason estivala son las vesitas teatralizadas a l’ecomusèu Çò de Joanchiquet de Vilamòs. Una actritz representa Rufina Monge, una femna que demorèt dins aquel ostal entre los sègles XVII e XVIII e qu’aculhirà los vesitaires en lor explicar lo patrimòni tradicional aranés, las mòrs e tradicions de l’epòca e las istòrias escondudas de la bastissa.
 
Las vesitas teatralizadas se debanan los 26 de julhet, lo 9 d’agost, lo 23 d’agost e lo 6 de setembre, en doas sessions cadun d’aqueles jorns. L’actritz, e mai se lor parla la  lenga del país, s’adapta totjorn a la dels toristas.
 
 

 
 
Mai d’informacion dins los imatges que seguisson e sul sit del Conselh General d’Aran.
 
 

 
 
Mai d’informacion dins los imatges que seguisson e sul sit del Conselh General d’Aran.
 



 
 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo Pèir B Sent Pantaleon
1.

Grandmercés a la Rufina per aquesta visita de l'ecomusèu Çò de Joanchiquet de Vilamòs fòrças interessanta e emocionanta, amb un tastet d'olla aranesa per acabar foguet encara melhora.

  • 0
  • 0

Escriu un comentari sus aqueste article