Sèm a un moment clau de la sason amb la fin de la primièra fasa en Superliga e Championship e amb la tenguda d’un eveniment de tria en Occitània e Catalonha: la Copa del Mond de XIII-cadieral.

XIII-cadieral: Los Blaus impressionan!
 
La primièra jornada de la Copa del Mond de XIII-cadieral se debanèt dijòus dins lo tot novèl gimnasi de Carcassona, ont degun sabiá pas faire marchar la climatizacion. Es doncas dins una brava calor que se debanèron las 3 partidas que vegèron la victòria aisida d’Austràlia fàcia a Galas 72-24, puèi la passejada dels italians dabans los escoceses 110-6. Aprèp la ceremònia oficiala de dobertura, se pensava veire un afrontament de primièra entre França e Anglatèrra. Mas los Blaus s’escapèron lèu, e, en despièch d’un subresaut dels Blancs a la represa, impausèron lor ritme e una bona circulacion de la palma per ganhar 71-31.
 
Dissabte, a Pàmias, Anglatèrra batèt Galas 78-32. Itàlia s’impausèt 68-39 fàcia a Espanha. Los australians ataquèron d’a fons la partida contra França, mas los Blaus tornèron menar lèu-lèu los jogaires de l’autra part de la Tèrra a la rason per ganhar: 102-22.
 
Mai que probable qu’angleses e franceses se tornaràn trapar divendres 28 a 7 oras del vèspre al Pargue de las Exposicions de Perpinhan per la finala. Los angleses faràn dintrar un o dos jogaires de qualitat qu’arribaràn per l’escasença per una partida que s’anóncia equilibrada e dinamica. Las finalas de Copa del Mond (2013) e Copa d’Euròpa (2015) entre las doas formacions se joguèron fins a la prolongacion!
 
 
Dragons: plaça al 8 del Mitan
 
Per clavar la primièra fasa de Superliga, los Dracs recebián lo cap de fila Castleford que menèt lèu-lèu 14-0. Mas los Sang e Aur comptavan pas de se daissar marchar suls pès e prenián l’avantatge abans la pausa: 18-16 amb 3 ensages marcats (Lucàs Albèrt, Gigòt e Yaha, amb las transformacions de Gigòt). Un ensag de penalitat permetiá als catalans de menar 24-22 a quauques minutas del tèrme, mas… dos ensages dels Tigres balhèron la victòria a Castleford: 32-24.
 
Los Tigres acaban aquesta primièra fasa amb 20 victòrias per 23 partidas e amb 10 punts d’avança suls segonds: Leeds. E coma los punts comptan per la segonda fasa… Wigan (23 punts) e Huddersfield (21 punts) auràn plan de mal per prene l’una de las quatre plaças qualificativas per las mièjas finalas.
 
Pels Dragons, un campionat novèl comença: los 8 del Mitan amb tres autras formacions de Superliga: Warrington, Leigh e Widnes e los 4 primièrs del Championship: Hull-KR, Londres, Featherstone e Halifax. Un rescontre de jogar contra caduna de las formacions: 4 a Brutus (Widnes, Leigh, Featherstone, Londres) e 3 a l’exterior (Warrington, Halifax, Hull KR).
 
Se caldrà pas mancar! Los 3 primièrs jogaràn en Superliga l’an que ven; los 4n e 5n jogaràn una partida de barratge.
 
 
Championship: pas de miracle per Tolosa
 
Dissabte, Tolosa finiguèt que ganhèt sus un ensag de darrièra minuta contra Featherstone 32-26. Victòria inutila que la victòria dimenge d’Halifax sus Hull KR 28-6 daissa los occitans a la mai marrida plaça: la 5a.
 
Los tolosans an perdut la qualificacion pel 8 del Mitan amb las desfaitas de la debuta de l’estiu contra de formacions de fin de classament. Domatge!
 
 
Mièjas finalas en Cup
 
Aquesta dimenjada, se jogaràn las mièjas finalas de la Cup: dissabte, Hull FC contra Leeds a Doncaster e dimenge, Salford-Wigan a Warrington sul camin de Wembley ont se debanarà, un còp de mai, la finala lo 26 d’agost (partidas de veire sus BeInSport).
 
 
NRL: la Tempèsta mena lo bal
 
En Austràlia, aprèp 18 jornadas, la Tempèsta de Melbourne es cap de fila (32 punts), seguida pels Poletons (30 punts), puèi per un trio a 28 punts: Bròncos, Làmias e Vaquièrs. Venon apuèi amb 26 punts Manly e Parramatta. La 8a plaça qualificativa per las pelhòfas demòra en jòc entre St George (24 punts) e Parramatta (22 punts). Serà malaisit de remontar lo retard per las 4 formacions a 18 punts: Raiders, Titans, NZ-Combatents e Dògols.
 
 
 
 
Alan Roch