Bandièra01 1180x150: Comuna de Tolosa

Actualitats

Fotbòl. Jornada 8: L'Olimpic de Marselha a las espatlas solidas

| © Fred
OM – Zlatan: 2-2
 
Dins una partida dont l’importància pesèt suls jogaires e sus la qualitat del jòc –èra lo primièr classic al som del classament dempuèi d’annadas–, l’OM mostrèt dimenge qu’a las espatlas solidas. Solidaris, ben organizats, valents al moment de recuperar las balas o de quichar l’adversari, dobriguèron logicament la marca, amb un golàs de Gignac, excentrat a l’angle de la superfícia. Mas ongan, quand lo PSG capita pas d’encadenar doas passas, Ibrahimović pren l’afar a son compte. Doas minutas, dos gòls, e lo silenci tornava dins lo Velodròm. Mas Gignac es en plena fisança, el tanben, e al cap d’una primièra mièja ora sens relambi, lo resultat final èra decidit. L’OM demòra primièr amb tres ponches d’avança.
 
 
Bordèu se’n tira plan
 
Per la tresena partida de la setmana, e un còp mai a doas oras de l’aprèsmiègjorn (a Francis Gillot li grevava, amb aquelas partidas qu’entrepachan los jogaires de s’aprestar com caldriá), Bordèu riscava pro. Après una desfacha dura a Newcastle, dijòus, los bordaleses avián besonh d’un resultat en Bretanha, per la fisança sustot. Quasi o capitèron; saupèron rampelar aprèp èsser estats menats, trobèron lo biais per téner lo balon, lo faire circular amb assegurança, e per gardar aquel resultat fins als còps de fiulet (1-1). Pasmens s’i podiá esperar mai, egal, amb un pauc mai de capitada e de volontat ofensiva, qu’aquel sector se poiriá ben convertir en problèma bordalés se las estatisticas del club puèjan pas ges.
 
 
Tolosa, sul fil
 
Ali Ahamada viu una debuta de davalada pro curiosa. Après lo sieu gòl de pas creire contra Rennes, lo portièr tolosenc, dimenge, daissèt escapar una bala que semblava pro aisada. Lèu-lèu, Valencianas menava de dos gòls. Calguèt alara una esquipa violeta ferotja per tornar al marcador. Ben Yedder lo primièr trapèt lo camin de la gàbia nordista (56a), per tornar metre l’esquipa lengadociana dins la partida. Mas la segonda tempsada semblèt voler escapar als òmes del Casanova, e calguèt esperar lo cap del temps reglamentari per veire Rivière rampelar enfin. Lo Club de Fotbòl de Tolosa se’n tira pas tròp mal, mas pòt regretar de pèrdre dos ponches contra un adversari dirècte. Sustot qu’amb totas las ocasions que se saupèron crear (e lo penalti que Sénher Cailleux fiulèt pas), la victòria èra possibla, dimenge.
 
 
Montpelhièr sens solucion
 
Poguèron dominar dins lo jòc e aténher la pausa amb un gòl d’avança, ongan la còla erauresa sembla que se foguèt levada del maissant pè. Khlifa, per tres còps, capitèt de faire bolegar los filats de Jourdren. Pauc menaçats tota la partida, los montpelhierencs s’inclinan un còp de mai, pròva de la lor manca de fisança, de la lor febrilitat, e de la capitada que s’es escapada pendent l’estiu. Lo president Nicollin, furiós, tempestèt e menacèt los jogaires, mas encara sens una vertadièra partida de referéncia, los jogaires de René Girard demòran amb las lors interrogacions (2-3).
 
 
Lo Gim sens capitada
 
Rems es l’esquipa en forma dempuèi quatre jornadas –se son impausats quatre còps aderren–. Mestregèron la partida, dissabte, amb serenitat e un coaching decisiu. Menats 1-0, los niçards tornèron pasmens de la pausa amb de conviccions, e rampelèron pauc aprèp l’ora de jòc. Mas l’òme del dia s’èra pas encara revelat. Courtet, entrat a la 54a minuta, anava balhar la victòria al sieu club. De dos gòls, a la 87a e dins lo temps suplementari, los espèrs provençals s’esvaniguèron (3-1). Malgrat una partida onèsta e volontària, los niçards quitan Champanha sens un ponch.
 
 
Los resultats:
 
Sant Estève – Nancí 4-0; Montpelhièr – Evian 2-3; Tolosa – Valencianas 2-2; Rems – Niça 3-1; Lilla – Ajaccio 2-0; Sochaux – Rennes 0-1; Bastia – Tròias 3-2; Brèst – Bordèu 1-1; Lorient – Lion 1-1; Marselha – París 2-2
 
 
Liga 1
 EsquipaPtsJGRPBpBcDif
1Olimpic de Marselha 19 8 6 1 1 12 7 5
2 París SG 16 8 4 4 0 14 5 9
3 Olimpic de Lion 15 8 4 3 1 13 8 5
4 FC Lorient 14 8 3 5 0 14 9 5
5 Estadi Rems 14 8 4 2 2 11 6 5
6CF Girondins de Bordèu 14 8 3 5 0 10 6 4
7Tolosa CF 13 8 3 4 1 11 9 2
8 Valencianas FC 12 8 3 3 2 13 8 5
9 AS Sant Estève 11 8 3 2 3 14 6 8
10 Lilla OSC 10 8 2 4 2 10 10 0
11 Estadi Rennes 10 8 3 1 4 10 11 -1
12 Estadi Brèst 29 10 8 3 1 4 8 13 -5
13 SC Bàstia 10 8 3 1 4 12 20 -8
14 AC Ajaccio 9 8 3 2 3 6 9 -3
15OGC Niça 8 8 1 5 2 11 12 -1
16Montpelhièr ECE 8 8 2 2 4 11 12 -1
17 Evian-Thonon-Gaillard 8 8 2 2 4 10 11 -1
18 FC Sochaux Montbéliard 6 8 2 0 6 7 13 -6
19 AS Nancí Lorena 4 8 1 1 6 2 14 -12
20 ES Tròias AC 2 8 0 2 6 8 18 -10

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

masdiset bordèu
3.

totas mas desencusas per l'error. solide, regattin marquèt !

  • 2
  • 0
Pirolet
2.

Lo jos-títol auriá pogut ésser tanben:
OM-Qatar: 2-2

  • 2
  • 0
Laurenç
1.

Mercé hòrt per aqueth article, ua (petita) precision pr'aquò: Entà la partida Tolosa-Valencianas, qu'ei lo joen Regattin que marquèc lo dusau gòl (que non pas Rivière com çò d'escriut dens l'article).

  • 2
  • 0

Escriu un comentari sus aqueste article