Bandièra01 1180x150: Comuna de Tolosa

Actualitats

Facebook presenta sa nòva plataforma de retransmission de vidèos apelada Watch

Aquel servici serà disponible tant dins la version web de Facebook coma dins las aplicacions per telefòns intelligents e televisions

Facebook presenta son nòu onglet de retransmission de vidèos nomenat Watch, que privilegiarà las sèrias e los programas originals produches pel quite ret social. Aquel servici serà disponible tant dins la version web de Facebook coma dins las aplicacions per telefòns intelligents e televisions.
 
Per preparar lo lançament de Watch, Facebook a engatjat de creators de contenguts per que tornen de material exclusiu. De soslinhar Kitchen Little, un programa de cosina realizat per d’enfants e creat pel famós compte culinari Tastemade, çò rapòrta un comunicat publicat dins lo blòg oficial de Facebook.
 
Pasmens, los contenguts non exclusius de Facebook auràn tanplan lor plaça dins Watch, coma los programas d’umor o las manifestacions esportivas, dont l’emission setmanièra d’una partida de la liga estatsunidenca de beisbòl.
 
En mai de tot aquò, Facebook ten son caire social e interactiu dins aquela nòva plataforma vidèo. Los usatgièrs poiràn veire çò que lors amics del ret social salvagardan dins un onglet apelat “çò que salvagardan los amics”, e quitament parlar amb eles quand agachan un programa o una sèria, e los poder comentar ensems. Watch permetrà tanben de partejar de programas e de sèrias amb los amics, salvagardar d’episòdis per los agachar pus tard e descobrir de nòus contenguts dins de seccions coma “çò de mai comentat” o “çò que fa rire mai las gents”.
 
Facebook a mes en marcha Watch aquesta setmana per un nombre reduch d’usatgièrs als Estats Units. Sabèm pas encara la data a la quala aquel nòu servici serà accessible al public en general.

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article