Bandièra01 1180x150: Comuna de Tolosa

Actualitats

Mas ont son passats los Dragons?

A, se Jòrdi podiá integrar la formacion catalana per la recepcion de Leigh (dessenh de Karen York, tirat del libre <em>Little globetrotters visiten Perpinyà i els Dracs catalans</em>, en venda a la botiga dels Dragons)!
A, se Jòrdi podiá integrar la formacion catalana per la recepcion de Leigh (dessenh de Karen York, tirat del libre Little globetrotters visiten Perpinyà i els Dracs catalans, en venda a la botiga dels Dragons)!
La sason avança, avança, e los Dragons catalans an interès a se bolegar per evitar una marrida suspresa en fin de sason. Per l’ora, Marcamal punta un pauc tròp lo nas del costat de Brutus.
 
 
Los Dragons sens defensa
 
Aqueste dissabte, los Dragons anavan desfisar los Lops de Warrington. Desfisar es un grand mot que, sus las primièras possessions de la palma, los angleses marquèron dos còps: 12-0 aprèp 9 minutas de jòc! Los catalans se trapèron menats 30-6 a la pausa e, se tornèron mai determinats sus la pelena, pleguèron tornar sus la fin: 24-52.
 
Dissabte, reçaupràn los Centurions de Leigh, eles tanben en marrida situacion, aprèp una desfaita dins las darrièras minutas sus lor pelena fàcia a Hull KR: 20-16.
 
Sustot, que los Dragons poiràn pas comptar sul concors magic de Jòrdi, l’eròi del libre que mescla tèxte, dessenhs e fotografias signat per Karen York: Little globetrotters visiten Perpinyà i els Dracs catalans. Lo libre, trilingüe (anglés, francés e catalan), conta la vesita de dos joves viatjaires, Susie e Tom, qu’arriban a Perpinhan un jorn de partida dels Dragons.
 
Anem, una bona novèla portaira d’espèr pels catalans: la qualificacion dels U-19 per las mièjas finalas de lor competicion. Acaban la fasa de classament en quatrena posicion e aniràn afrontar lo cap de fila Wigan.
 
 
Castleford es ja en mièja finala
 
Dins lo primièr grop, Castleford va ganhar a Salford: 23-4. Hull-FC se va impausar 8-6 a St Helens. Wigan bat Huddesfield 18-4 e Wakefield es sens pietat per Leeds: 38-6. Castleford es, per lo mens, assegurat de sa qualificacion per las mièjas finalas amb sos 42 punts. Leeds (32 pts) e Hull FC (31 punts) seguisson a distància. Demòra una plaça en jòc entre Wakefield (28 pts), St Helens (27 pts), Salford (26 pts) e Wigan (25 pts). Huddersfield (23 pts) sembla condemnat a la figuracion.
 
 
Tolosa reçaup Rochdale
 
Aprèp lor desfaita dins la darrièra minuta a Dewsbury (34-36), lo Tolosa Olimpic totjorn en cap de sa competicion, lo Bloquièr, reçaupràn Rochdale aqueste dissbate a 8 oras del ser a Blanhac.
 
 
La Tempèsta encara e encara
 
En Austràlia, la Tempèsta de Melbourne ganha la partida contra son segond al classament: los Poletons: 16-13. Los Cavals fòls baton largament los campions de Cronulla: 32-10.
 
 
Se passatz per Albi
 
Remembrança: la mòstra “XIII, sport populaire du Tarn” se pòt véser fins al cap d’aqueste mes d’agost als Archius Departamentals de Tarn.
 
 
 
 
Alan Roch
 



abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article