Bandièra01 1180x150: Comuna de Tolosa

Actualitats

Escàndol dels uòus contaminats: lo govèrn bèlga ajudarà las entrepresas

De milions d’uòus de pola son estats levats del comèrci, dont d’uòus estampilhats “bio”

| sophie & cie
Lo govèrn bèlga prepausèt dimècres passat d’indemnizar las entrepresas del país afectadas per l’escàndol dels uòus contaminats per l’insecticida fipronil, amb la tòca de cobrir las despensas ocasionadas per l’escàndol e la destruccion dels produches contaminats, çò rapòrtan los mèdias locals.
 
Lo govèrn bèlga a anonciat dètz mesuras per sosténer las societats afectadas per aquel afar que son epicentre es en Belgica, lo primièr estat qu’a notificat a las autoritats europèas l’existéncia de l’insecticida dins los uòus. L’Agéncia Federala per la Seguretat de la Cadena Alimentària de Belgica (AFSCA) serà encargada de concedir las indemnizacions, malgrat qu'encara ne calga determinar las condicions, las categorias de beneficiaris e las quantitats maximalas de recebre, çò soslinha RTBF.
 
Las compensacions comprendràn dos tipes d’ajudas. D’un caire, d’indemnizacions pels còstes operacionals ocasionats per la crisi, principalament restacats al transpòrt, al netejatge, al tractament, a la destruccion e la descontaminacion dels animals e dels produches. D’autre caire, se destinaràn a cobrir lo deficit generat per la destruccion dels produches contaminats.
 
Demest de las mesuras presentadas pel govèrn bèlga i a de facilitats per pagar los impòstes e los escotissons socials, amb d’exempcions envisatjadas dins cèrts cases. Tanben se permetrà a las bòrias avicòlas e a l’indústria alimentària de sollicitar lo caumatge temporal.
 
En mai de tot aquò, lo govèrn bèlga a anonciat que se constituirà coma partida civila dins los jutjaments contra las societats responsablas d’aquel afar per obténer de compensacions pel prejudici economic qu’an ocasionat.
 
 
L’escàndol dels uòus contaminats al fipronil
 
En junh passat, un esplechaire de Belgica sonèt l’alarma. En seguida, una enquèsta facha per l’AFSCA determinèt qu’una entrepresa neerlandesa apelada ChickFriend aviá revendut de tractaments de la societat bèlga Poultry-Vision contra lo pesolh roge de las polas.
 
Aqueles tractaments a basa de l’insecticida filpronil son enebits pels animals destinats al consume uman, mas son estats emplegats per d’entrepresas de desinfeccion dins de tenements agricòlas als Païses Basses, en Belgica e Alemanha.
 
De milions d’uòus de pola son estats retirats del comèrci, dont d’uòus estampilhats “bio”. La carn de polet seriá pas concernida.
 
Segon de facturas, de tractaments a basa de fipronil pel sector avicòla serián estats liurats en Belgica dempuèi mai de 2016. Per tant, es fòrça probable que diferents aliments industrials, que fan servir d’uòus de pola, contengan de fipronil, e mai se segon l’AFSCA pòdon èsser consumits en tota seguretat.

 

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article