Bandièra01 1180x150: Comuna de Tolosa

Actualitats

SocietatPoliticaInternacional

Catalonha: un jornal assegura que la CIA aviá avertit los Mossos de l’atemptat de Barcelona

Lo jornal El Periódico de Catalunya a publicat un document pauc fisable qu’a fach escàndol

Lo jornal El Periódico de Catalunya descadenèt una polemica de las grandas dijòus passat en Catalonha. Lo jornal assegurava “en exclusivitat” que la polícia catalana, apelada Mossos d’Esquadra, aviá recebut lo 25 de mai passat una averténcia dels servicis secrets dels Estats Units que l’Estat Islamic planificava de cometre un atemptat aqueste estiu “especificament a la Rambla” e en d’autres luòcs toristics de la ciutat. Dins aquel sens, El Periódico de Catalunya publicava una “nòta originala” de la CIA, que curiosament èra redigida dins un anglés fòrça marrit e clafit de decas.
 
Lo govèrn de la Generalitat de Catalonha refusèt categoricament aquela informacion. “Volèm denonciar la campanha de descrèdit que menan qualques sectors contra los Mossos. Es irresponsabla, cèrca de presentar un problèma inexistent e met en question lo prètzfach excellent qu’an realizat los Mossos”, çò diguèt lo conselhièr de l’Interior de la Generalitat, Joaquim Forn.
 
Pus fòrta foguèt la responsa del major dels Mossos d’Esquadra, Josep Lluís Trapero, que diguèt qu’aquela informacion èra “absoludament falsa” e pausèt una question a Enric Hernández, lo director del jornal: “Qui vos a dictat tot aquò?”. Ansin, Trapero diguèt que dobtava d’Hernández, “d’el, de l'informacion, dels intermediaris e de la volontat amb la quala o [fasián]”.
 
 
 
 
Julian Assange demanda la demission d’Hernández
 
Puèi, Julian Assange, cap-redactor de Wikileaks, metèt en question la publicacion de El Periódico de Catalunya. “Lo jornal publica un document dels servicis secrets estatsunidencs extrèmament suspècte a prepaus d’un atac de l’EI a Barcelona e just abans lo referendum catalan”, çò publiquèt Wikileaks sus Twitter.
 
E dins una autra fiulada, Wikileaks assegurèt que lo quite director de El Periódico de Catalunya aviá reconegut que lo presumit document de la CIA èra una transcripcion realizada a la redaccion del jornal a partir d’una informacion que se recebèt telefonicament.
 
Enfin, Assange demandava la demission del director del jornal catalan: “Enric Hernández deuriá demissionar. A participat a una clara temptativa d’enganar lo public”.
 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Mas se la cia es lo causant de la guerra de Siria e lo qu' ha creat e pagat als mercenaris de la contra terroristas. Coma pot informar de res ? Nomais dis mentidas.

  • 0
  • 0
Pirolet
1.

Le Monde a tanlèu représ l'informacion de El Periódico amb tot un paragraf per explicar que El periódico es un jornal seriós. D’abituda publica las informacionsnacionalistas espanhòlas de El País que, après èsser estat la votz del PSOE, es vengut la votz del PP, e que malgrat aquò passa per un “journal de référence”, coma lo de París. Aqueste còp li a calgut cercar las messorgas endacòm mai. Evidentament, res sus la reacción d’Assange. Benlèu es perque lo supausat comunicat de la CIA es clafit de decas que Le Monde s’es sentit obigat d’afortir sa fe dins El Periódico. Sustot quand sabèm que l’ortografia, a cò de Le Monde, es la tragedia del cadajorn.

  • 6
  • 0

Escriu un comentari sus aqueste article