Bandièra01 1180x150: Comuna de Tolosa

Actualitats

De menaças de l’estat espanhòl per que se faga pas lo referendum

Lo president espanhòl, Mariano Rajoy, a menaçat los foncionaris e los cònsols màgers per que se mene pas a bon tèrme lo referendum independentista, del temps que lo ministèri public espanhòl demanda de perseguir al penal lo burèu del Parlament e qualques membres del govèrn de la Generalitat.


Ièr dijòus, l’endeman de l’aprobacion de la Lei del Referendum pel Parlament de Catalonha e de la consecutiva convocacion del vòte, lo president del govèrn espanhòl, Mariano Rajoy, anoncièt la recusacion de la lei catalana al Tribunal Constitucional. En mai d’aquò, demandèt de notificar de responsabilitats penalas al president catalan, Carles Puigdemont, als membres de son govèrn, a totes los nauts responsables de la Generalitat qu’ajan de responsabilitats dins lo referendum e als cònsols màgers de 947 comunas. Dins aquela notificacion lo govèrn espanhòl vòl que s’avertisca totas aquelas personas que son obligadas d’empedir quina iniciativa que siá per l’organizacion del referendum.
 
Rajoy repetiguèt divèrses còps que lo referendum se tendriá pas. “La consulta se farà pas. I aurà pas nat referendum perque aquò consistís a privar l’ensems dels espanhòls de decidir lor avenir. Ni lo govèrn ni mai los tribunals o pòdon pas tolerar en cap de cas”, çò declarèt dins una conferéncia de premsa qu’acceptèt pas de questions dels jornalistas.
 
En mai d’aquò, Rajoy diguèt que la convocacion del referendum èra “clarament un acte de desobesissença, e lo govèrn se considèra obligat de defendre la dignitat de las institucions. Sèm obligats de far complir la constitucion”.
 
Dimècres passat,  dins una jornada plena de tensions e de trabucs, la majoritat independentista de la cambra catalana aprovèt una lei que permetèsse de realizar lo referendum d’independéncia del 1r d’octòbre que ven. E dijòus s’aprovèt la lei de transitorietat que definís cossí deu aver luòc lo pas devèrs una republica independenta. La reaccion del govèrn espanhòl al Parlament de Catalonha es restada sus sa linha abituala.
 
 
Perseguits al penal
 
Lo procuraire general de l’estat espanhòl, José Manuel Maza, compareguèt tanben per anonciar que fariá de denóncias al penal contra los membres del burèu del Parlament de Catalonha per aver permés l’examen de la lei del referendum e de la lei de transitorietat. E mai contra los membres del govèrn de la Generalitat, per aver signat lo decret de convocacion del referendum.
 
Lo ministèri public considèra qu’an comeses de delictes de desobessisença, prevaricacion e malversacion de fonzes publics.
 
En mai d’aquò, donèt instruccions a la Gàrdia Civila, a la polícia espanhòla e als Mòssos d’Esquadra per qu’enquistèsson sus totas las accions de preparacion del referendum.





abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lafontan
6.

Çò que se passa en Espanha es grèu, es una ataca contra la libertat dels pòbles a s'autodeterminar, contra la democracia tot cort ! Los/las occitan-a-s avèm de nos solidarisar al mai que podèm, fisicament tanben per los que podran dins las setmanas venentas amb una presénsia fisica a lor costat. Aquela libertat es tanben lo futur de l'Euròpa qu'avèm de bastir e plan segur aurà de consequéncias per Occitània tanben....

  • 8
  • 0
francesc palma
5.

Amenaça qu' amenaçaràs e cap envant te faràs. Adolf Hitler.
Ara ven lo guiterranho amb un sac e s'emportarà a los nins que volen pas dormir.
Lo lop que se manget a Na Capucheta la paur que fassia. Havia unas dents molt grosses per manjar-se los infants. Mas los infants no tenien paur!
No m'acolhonis recoi.

  • 3
  • 1
Pèire lo Ceremoniós
4.

Lo procuraire general de l’estat espanhòl, José Manuel Maza, compareguèt tanben per anonciar que fariá de denóncias al penal contra los membres del burèu del Parlament de Catalonha per aver permés l’examen de la lei del referendum e de la lei de transitorietat. E mai contra los membres del govèrn de la Generalitat, per aver signat lo decret de convocacion del referendum.

Es per aiçò qu'a ieu, me semblariá fòrça legitime que los membres del burèu del Parlament de Catalonha e los membres del govèrn de la Generalitat perseguiguèssen al penal lo procurarai general de l'estat espanholista per aver ensajat d'empachar la liure expression electorala d'un pòble al dintre de l'espandi democratic europèu, davant lo tribunal penal internacional de Lahaye…

  • 16
  • 0
Emmanuèl Isopet
3.

Paura Espanha... amb un tal govèrn, cossí debatre, far avançar d'idèas, modernizar sas institucions, melhorar la democracia...
Per contra sap crear de frustracion, radicalizar lo monde...

  • 11
  • 0
L\'oxydant La talvera
2.

Paures catalans... Sètz pas gastats amb de tipes coma aquò al govèrn ! Vos desiri çò melhor per los meses que venon. Que los catalans viscan enfin lor libertat plenament !

  • 15
  • 0

Escriu un comentari sus aqueste article