Bandièra01 1180x150: Comuna de Tolosa

Actualitats

Rugbi de XIII: los catalans an lor destin en mans

Hull KR festeja lo retorn en Superliga abans de reçaupre los catalans divendres (partida retransmesa per BeInSport)
Hull KR festeja lo retorn en Superliga abans de reçaupre los catalans divendres (partida retransmesa per BeInSport)
Anam pas faire d’alonguis de presentacion per vos dire que los Dragons Catalans an signat, sus lor pelena de Brutus, una victòria importantissima aqueste dissabte fàcia a Featherstone. De segur, prenguèt pas l’ample esperat, mas los 2 punts de la victòria son d’una importància bèla al classament.
 
Aprèp la partida a Halifax, Greg Bird a pres tres partidas de suspension per un placatge en catedrala. Krisnan Inu dobrissiá la marca, mas Featherstone replicava. Williame e Garcia marcavan. Los Dragons se podián enaurar mas la palma d’ensag èra interceptada e Featherstone tornava a 12-16 a la pausa. Dins lo darnièr quart d’ora, los catalans ajustavan una penalitat (Walsh) e un ensag (Moa) per ganhar 26-12.
 
Al classament: amb 10 punts, Warrington son tre ara assegurats de jogar en Superliga l’an que ven. Widnes es tresen (6 punts, + 68), los catalans seguisson (6 punts, mas – 18); Leigh es cinquen (4 punts, + 28).
 
Es doncas fondamental pels Dragons d’anar ganhar a Hull KR divendres (e serà pas aisit) abans de se jogar (e ganhar) una “finala” lo 23 amb la recepcion de … Widnes. Autrament, serà lo Million Pound Game: lo manten en Superliga de jogar sus una sola partida.
 
 
Superliga: quatre per doas plaças
 
En Superliga, Castleford domina son segond Leeds 38-24, mas las doas formacions son ara asseguradas de reçaupre en mièja finala.
 
Salford e Huddersfield an perdut tot espèr de qualificacion. St Helens pòt encara somiar aprèp sa victòria a Wakefield, aprèp  un ensag a la 77a minuta: 18-16. A Hull, Wigan pren lo revenge de la finala de la Cup sus Hull FC: 30-22 e li pana la tresena plaça a la diferéncia de punts.
 
Wigan e Hull an 31 punts, Wakefield 30 e St Helens 29. Caldrà esperar la darrièra dimenjada de setembre per saupre las oposicions de las mièjas finalas.
 
 
Tolosa cartona
 
Novèla e ampla victòria del Tolosa Olimpic dins sa competicion del Bloquièr: 56-14 contra Batley. Novèla recepcion aqueste dissabte 16 (18h) amb la venguda de Swinton, abans la mièja finala del 23 de vèspre totjorn a Blanhac. Tolosa que se refortís ja bravament per la sason venenta amb la signatura de Sam Rapira, l’internacional neozelandés que pòrta per ara las colors dels Gigants d’Huddersfield.
 
 
Austràlia: la Tempèsta e los Polets en mièjas finalas
 
Aquesta fin de setmana, èra la debuta de las pelhòfas en NRL. Poguèrem seguir (sus BeInSport), quatre partidas plan capitadas, disputadas e jogadas sus un ritme fòl: de XIII, qué!
 
Dins lo naut del tablèu, tre divendres, los Polets de Sydney resiston als Bròncos de Brisbane per ganhar: 24-22. Dissabte, la Tempèsta de Melbourne conten las Anguialas de Parramatta: 18-16. Los dos venceires son qualificats per las mièjas finalas.
 
Dins lo bas del tablèu, dissabte, las Pantèras de Penrith van eliminar las Aglas de mar de Manly: 22-10. Dimenge, las Làmias de Cronulla e los Vaquièrs van fins a las prolongacions: Cronulla menèt pendent 75 minutas, mas perdèt: 15-14! La tradicion es atal respectada: dempuèi la debuta de la NRL, cap de campion sèrva pas lo trofèu la sason seguenta!
 
Aquesta fin de setmana, en barratge, Brisbane reçauprà Penrith (divendres) e los Vaquièrs aniràn desfisar Parramatta (dissabte). Aquò promet!
 
 
 
Alan Roch
 
 
 


abonar los amics de Jornalet
  
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article