Lo president dels Estats Units, Donald Trump, a criticat durament lo “regim depravat” de la Corèa del Nòrd. O faguèt dimars passat durant un discors davant l’assemblada generala de l’ÒNU, ont diguèt que la paciéncia de son govèrn aviá un limit e qu'èra dispausat a destruire la Corèa del Nòrd s'aumentavan las menaças. “Aurai pas cap d’autra causida que de destruire totalament la Corèa del Nòrd”, çò diguèt textualament.
 
Dins un ton radicalament opausat al de son predecessor, Barack Obama, Trump legiguèt un discors d’aperaquí 40 minutas ont ataquèt los païses qu’aviá criticats durant los darrièrs meses.
 
“Es ora que la Corèa del Nòrd veja que la nuclearizacion es pas un futur acceptable”, çò assolidèt en tot criticar que i aguèsse de païses que contunhèsson de collaborar amb lo govèrn nòrd-corean.
 
Quant a Iran, diguèt qu’es un país “exportator de violéncia, tuariás e caos”, e critiquèt l’acòrdi que permetèt de restrénher lo programa nuclear iranian, que lo qualifiquèt de “vergonha”.