Lo president de Turquia, Recep Tayyip Erdoğan, menacèt dissabte passat las autoritats curdas en lor dire que pagarián un prètz per aver fach lo referendum sus l’independéncia del Curdistan Meridional de l’estat iraquian. De remembrar que lo vòte culminèt amb un resultat categoric en favor de l’independéncia amb gaireben lo 93% dels sufragis malgrat lo refús de la comunautat internacionala, e las menaças d’Iraq, Iran e Turquia. “Planhèm pas lo passat, mas vistas las condicions, e perque las autoritats curdas se son viradas contra nosautres, pagaràn un prètz”, çò diguèt Erdoğan. “Son pas un estat independent. Dobrisson una plaga per i poder tòrcer lo cotèl dedins” çò apondèt.
 
Aquelas declaracions las faguèt lo president de Turquia dins una amassada amb de simpatizants de son partit dins la vila d’Erzurum.
 
Erdoğan, e l’estat turc qu’el govèrna amb una man de fèrre, tenon de relacions comercialas importantas amb lo Curdistan del Sud. Lor ajudan a exportar de petròli gràcias a sos oleoductes. Ça que la, fa de meses qu’Ankara es en guèrra contra las milícias del Partit dels Trabalhadors de Curdistan (PKK) e a paur de pèrdre lo contraròtle del Curdistan del Nòrd se trionfan los independentistas al sud.
 
De fach, abans lo referendum, Erdoğan aviá ja menaçat lo Curdistan Meridional de suspendre lo passatge del petròli pel territòri turc.