Bandièra01 1180x150: Comuna de Tolosa

Actualitats

Rugbi de XIII: ara, i sèm!

Pels Blaus, un pauc de torisme abans las causas seriosas
Pels Blaus, un pauc de torisme abans las causas seriosas | FFRXIII
Pendent una mesada, tota nòstra atencion portarà sul debanament de la Copa del Mond de XIII e sas partidas que se debanan en Austràlia, Nòva Zelanda e Papoa-Nòva Guinèa. Se poiràn totas seguir sus las antenas de BeInSport.
 
La partida de dobertura opausarà los campions actuals e mai que jamai favorits: los australians a Anglatèrra. Partida que se jogarà divendres a Melbourne.
 
Dissabte, Nòva Zelanda reçauprà Samoa Auckland e l’estadi de Pòrt Moresby veirà l’afrontament dels papós e dels galeses, alara qu’Itàlia e Irlanda se rescontraràn a Cairns.
 
Dimenge, doas partidas son al programa: Escòcia-Tònga a Cairns e, çò que nos interèssa fòrça, los occitanocatalans contra Liban a Canberra.
 
 
Jogar la competicion sus una partida
 
Los Blaus an passat una setmana dins un centre esportiu de Sydney, abans de ganhar Canberra per èsser prèstes pel rescontre amb Liban que presenta mièga dotzena de jogaires d’NRL e d’autres jogaires de las competicions australianas . Un sol jogaire pren part al campionat de Liban!
 
Un XIII rejovenit (mai per necessitat que per causida) deurà comptar sus sa volontat, son engatjament e una fòrça morala per ganhar la partida que lor dobrirà las pòrtas dels quarts de finala.
 
Aquò correspondriá als objectius fixats per la Federacion e tanben pel Ministèri dels Espòrts, e permetriá d’afortir la credibilitat dels Blaus al nivèl internacional. Una desfaita e tot l’ostal seriá tornarmai de bastir… Demòra d’esperar qu’aqueste enjòc despasse pas lo jòc dels Pols e lor siague pas tròp pesuc sus las espatlas.
 
 
 
 
Alan Roch
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article