Dempuèi sa creacion Jornalet patís una manca cronica de mejans financièrs. Es un tèma qu'avèm sovent discutit, tant dins lo quite Jornalet coma dins los rets socials. De far foncionar un jornal electronic cada jorn exigís un trabalh dels grands al nivèl de la velha informativa, de la redaccion, de la revision lingüistica, de l'animacion de la còla, de la mesa en linha. Aquesta aventura jornalistica liura, independenta e occitana demanda a sos mestierals una granda abnegacion en nom d'aquesta causa. Lo problèma es que l'abnegacion noirís pas, e decentament non se pòt pas demandar a degun de trabalhar dins lo jornalisme sens èsser pagat. Lo benevolat a de limits que son rapidament atenches. E parlarem pas dels còstes de mantenença e de desvolopament del sistèma informatic.
 

L'associacion Los Amics de Jornalet, de drech francés, foguèt creada amb la tòca de recampar los dons -essencialament en provenença de l'estat francés- e de los mandar a Barcelona, sèti de la redaccion de Jornalet. Es una mena de boita postala de transferiments de fonzes. Los dons que recebèm cada an son de mai o mens 2000 èuros qu'enviam integralament a l'ADÒC, supòrt juridic de Jornalet a Barcelona.

L'associacion Los Amics de Jornalet a ensajat de demandar de subvencions publicas a totas las collectivitats terriotorialas d'Occitània (conselhs departamentals e conselhs regionals). Nada nos volguèt pas ajudar. Recebèrem sonque de letras de refús, de part de las collectivitats qu'aguèron la cortesiá de nos respondre.

Tre lo moment de sa creacion, l'ÒPLO tanben foguèt sollicitat per una ajuda financièra perenna. De senhals orals encoratjants son venguts d'aquel organisme mas per ara res de concret n'es pas sortit. Los meses passan e lo finançament de Jornalet se fa cada còp mai dificil.

L'associacion Los amics de Jornalet a decidit d'ensajar un nòu modèl de finançament. A cada sason, siá 4 còps per an, bandirem una campanha de micromecenatge. La que lançam uèi durarà fins al 12 de decembre. Per aquesta primièra, avèm causit un objectiu simbolic de 1000 èuros, que nos sembla de bon aténher.

Al fil dels ans avèm aprés qu'en matèria de jornalisme occitan podèm pas comptar que sus nosautres, sus nòstras fòrças e... sus nòstra moneda. Los micromecenatges son una forma justa e ciutadana de finançament que cadun i pòt portar çò que vòl o pòt segon sos mejans. Son tanben d'una utilizacion facila -ja que tot se passa per Internet- e securizada: Ululé es un sit francés de micromecenatges reconegut e seriós.

L'aventura de Jornalet se deu perseguir, afortir e desvolopar. Cadun i ten un ròtle important a jogar.

Endavant!

Gerard Joan Barceló,
president dels Amics de Jornalet






Anatz sus: https://fr.ulule.com/jornalet/