Bandièra01 1180x150: Comuna de Tolosa

Actualitats

Corsega: una multa de 135 èuros per aver parlat còrs als gendarmas

Un ciutadan còrs es estat castigat per aver revendicat lo drech de parlar sa lenga dins son país e refusat de parlar francés dins un contraròtle policièr

Un ciutadan còrs es estat punit amb una multa de 135 èuros per aver parlat en còrs als gendarmas durant un contraròtle. L’afar se passèt fa qualques meses mas ara es conegut del public, çò rapòrta Corsica Oggi.
 
L’òme refusèt de parlar en francés quand o li demandèron, en defendent qu’en Corsega aviá drech de s’exprimir en còrs, e qu’en tot cas èra lo dever dels gendarmas de conéisser la lenga del país. Los gendarmas aurián pas comprés las responsas del ciutadan, e decidiguèron de li infligir una punicion de 135 èuros.
 
De fach, en Corsega, i a una consciéncia per la militància lingüistica pus granda qu’en Occitània, e fòrça an la dignitat d’emplegar la lenga del país sus las envolopas de las letras, los chècs bancaris, e dins la vida vidanta en general. De tot biais, l’egemonia del francés, fruch de l’imperialisme lingüistic, fa de viure en còrs en Corsega un acte de militància e de lucha e non pas de normalitat, puèi que de parlar còrs sembla ara quicòm de quasi anormal. E en Occitània la situacion es fòrça pièger. 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

E Passa Que T Ai Vist Lo Clapàs (Montpelhièr)
14.

#13 Avètz saique rason mas aquò qu'es tras que significatiu e fòrça parladis, es qu'es quand mèsma lo primièr còp en gaireben 250 ans de presència francèsa en Corsèga qu'un tipe es verbalizat perque charra en lenga còrsa. E aquò non es per azard o pel zèli excessiu de la polalha francimanda. Es clarament una provocacion de l'aparèlh d'estat contra l'identitat còrsa qu'auça un pauc tròp lo cap, al gost de Paris. Provocacion maladrècha, plan dins l'andana dau drollèt Macron que vòl far l'òme de poder, lo mèstre grand centralizaire e autoritari e que passarà, coma los autres.

  • 4
  • 0
ltrobat
13.

Dens aqueth ahar, ne conseishem pas lo detalh deus hèits.
Qu'ei segurament possible que los gendarmas ne sian pas còrses. S'ei lo cas que semblaré normau de respóner au gendarma dens ua lenga que posca compréner... E ne pensi pas que i aja en Corsega poblans que parlan còrse shens que sapian un drin de francés.
Qu'èi un punt de vist purament personau, mes quitament se n'èi pas la religion de las institucions jacobinas e de las soas fòrças de l'ordi, har cagar quauqu'un qu'a, per eth, la legalitat e la fòrça que'm sembla estar ua manifestacion d'eroisme drin inutila.

  • 0
  • 0
E Passa Que T Ai Vist Lo Clapàs (Montpelhièr)
12.

"De parlar còrs sembla ara quicòm de quasi anormal." Es saique çò que l'estat francès voldria faire creire. Quand òm viatja en Corsèga es un encantament d'ausir la lenga restontir per carrièiras, montanhas e campanhas d'un biais espontanèu e natural. Situacion que dins l'amira centralizaira francèsa se devria pas d'existir. Sembla èsser lo primièr còp qu'un ciutadan siague verbalizat per aver parlat còrs, foguèsse a de gendarmas. Aquesta multa es una provocacion evidènta, implicitament encoratjada pel gobèrn actual contra l'identitat còrsa, e un messatge subliminal mandat a l'Assemblea de Còrsega que Paris trapa un pauc tròp... "còrsa" . I cal veire un efièch de la volontat macroniana de tornar afortir l'egemonia jacobina sus França tota. Aquesta volontat de Macron de renforçar fòrt e mòrt lo centralism parisenc, e que confla mai d'un elegit regional (emai C.Delga, es dire !), sembla donar d'alas e de zèli als servidors de l'estat francès. De las cosinas a las establas.

  • 13
  • 0
ltrobat
11.

#1
La màger part deus quessòts de la navèra coleccion d'Adishatz que son en francés.
Adara, quan crotzas un policièr franchimand dab un quessòt Adishatz sus l'esquia n'auras pas de pagar ua esmenda per otratge a las autoritats republicanas.

  • 3
  • 0
Gascon mes pas con Rodrigos-las-conarias
10.

#9 urosament que'vs podetz adressar dens la vosta lenga aciu e non pas en occitan larg ... e quitament que podetz contunhar dab las vostas peguessas sens relambi

  • 8
  • 0

Escriu un comentari sus aqueste article