Los responsables del popular ret de microblògs, Twitter, an blocat pel primièr còp un compte d’usatgièr, coma explica lo conselhièr juridic de l’entrepresa, Alex Macgillivray. S’es passat en Alemanha: i an enebit l’accès al compte d’un grop neonazi après la demanda facha per la polícia locala. Lo compte, ça que la, es visible en defòra d’Alemanha.
 
“Diguèrem qu’aviam ja la capacitat de blocar de contenguts, e avèm emplegat pel primièr còp aquela capacitat contra un grop considerat illegal en Alemanha”, çò expliquèt Macgillivray
 
De fach, es pas exactament lo primièr còp que Twitter barra un compte. L’estiu, se desfermèt la polemica quand se barrèt lo perfil del jornalista Guy Adams, qu’aviá criticat sevèrament lo seguiment qu’NBC fasiá dels Jòcs Olimpics. Ça que la, Twitter o rectifiquèt e se desencusèt còp sec.