Bandièra01 1180x150: Comuna de Tolosa

Actualitats

Tolosa: an lançat una campanha contra la Tor Occitània

S’opausan al projècte de gratacèl de 150 mètres que portariá la “deterioracion de la qualitat de vida dels tolosans”

| Compagnie de Phalsbourg
S’es lançada en linha una campanha contra la construccion d’un gratacèl al centre de Tolosa, la dicha Tor Occitània. S’agís d’un projècte immobilièr faraonic que se debana dempuèi març de 2016 “dins una opacitat absoluda”, segon lo collectiu qu’a bandit la campanha.
 
Lo projècte consistís en un gratacèl de 150 mètres de nautor pròche la gara de Matabuòu, conegut del public tolosan lo 13 de julhet de 2017. Lo bastiment deuriá aculhir, sus 34 000 m2, una ostalariá de 4 estelas, un restaurant, de lotjaments de luxe, de burèus e de comèrcis.
 
Lo collectiu antigratacèl planh que la decision siá estada presa sens informar ni consultar los abitants de la Ciutat Mondina. En mai d’aquò, dison que vòlon pas “èsser espectators de la destruccion del païsatge urban”, vòlon pas “portar prejudici a la biodiversitat e a l’integritat del Canal de las Doas Mars”, “subir la deterioracion de la qualitat de vida dels tolosans: pollucion e aument del trafec automobil, ombras portadas, reverberacion”. E mai creson que lo projècte es ecologicament irresponsable, contribuís a l’especulacion immobilièra e finançarà amb los impòstes de totes un projècte per l’elèit.
 
En mai d’aquò, exigisson que los tolosans se pòscan prononciar democraticament abans que lo projècte siá lançat, sens permetre que los promotors immobilièrs “dicten” la politica urbana de Tolosa.

 
Signar la peticion sus Change.org

 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
6.

Cresi qu' aqueste gratacels es molt lord (lletg) . Tolosa es una ciutat polida e ten son encant. Mas amb aquesta puta porqueria de ciment al mieg del riu, seria una perdua irreparabla per l'equilibri urbanistic actual. Fora lo gratacul ! Que ho fotin a un loc fora de la ciutat ont non molesti pas a la ciutat antiga .

  • 2
  • 0
Jean-Charles Valadier Tolosa
5.

#4 la question de l'alternativa es plan pausada. Uèi son las zònas comercialas e d'activitat que consomisson 300ha per an a Tolosa, siá l'equivalent del centre ciutat en 2000 ans d'istòria. Los barris ancians (e des rics) del centre son dos còps mai pòblats que los barris de torres Hlm et 10 còps mai que los barris de las villas de las banlegas. Un urbanisme orizontal sul modèl tradicional occitan amb una mescla de servicis e abitacions e una mescla sociala es lo sol que garantisca lo manten de la convivéncia urbana. Çaquela, non es pas rentable per l'industria del BTP e de la finança internacionala.

  • 5
  • 0
Franc Bardòu
4.

Lo problèma que nos pausam aquí es mai qu'un problèma arquitectural. Dins las vilassas coma Tolosa, son a se mainar que de s'espandir en surfàcia lor es vengut impossible. Mas, dins lo meteis temps, las populacions de vilassas occitanas son encara a crèisser, crèisser, e crèisser sempre. Alavètz, cèrcan a s'espandir en nautor, d'ara enlà. La tor que ne parlam aicí non vos sembla en armonia amb lo demai ambient ? Se'n chautan ben pro, los conceptors e urbanistas, estant que dins son sicap futorologista, tot lo demai serà vengut de tors, tot a l'entorn, lèu lèu. Per aver idèa de çò que son probablament a concebre, vos cal davalar del metro de Plaça de les Glòrias e marchar nas en l'aire fins a la mar, subre l'avenguda Diagonala, a Barcelona, puèi continuar marchant en seguissent la mar, cap al sud, fins al Pòrt Olimpic e a l'estacion de metro Ciutadèla. Aquí veirètz cossí s'imaginan Tolosa, mas atanben Bordèu, Montpelhièr, Marselha, Niça, d'aquí a cinquantas o cent ans.

Non disi pas que cal èsser per o contra una tor atal. Disi que cal èsser coërent. Se non volètz d'una tor atal, cal èsser tanben contra l'espandiment de las populacions urbanas, contra la desertificacion de las zònas de campèstre, contra lo sistèmi economic qu'engimbra la concentracion urbana e contra lo sistèmi economic qu'emgimbra lo besonh de creissença de l'efectiu de populacion, es a dire contra tot sistèmi fondat fin finala subre la creissença quantitativa.

Èsser contra una tor atal sense tornar metre en question tot çò mai reven un pauc a èsser contra lo fait d'aver la man banhada en cabussant dins l'aiga per i anar quèrrer l'anèl de Catarina al Pont de Mirabèl…

  • 14
  • 0
Pirolet
3.

#2 Justament, òm pòt pensar que los arquitèctes an "delirat"* lo projècte un jorn de vent d'Autan. E que quand la comuna diguèt de òc, l'Autan bufava encara.

*O: perpetrat, se vos agrada mai.

  • 2
  • 0
Gerard Cairon Florentin d Albigés
2.

Parlarai pas de la pertinencia d'aquela torre, al regard del paisatge urban, de l'environament, de l'argent degalhat.
Pas qu'una pichona causa simplassa, que me demandi s'aqueles cabinets d'arquitècts i an pensats, e se los responsables de la comuna, per paur de passar per de pècs (coma se dis a Sant Subran) al regard de cabinets considerats "prestigioses", an gausat lor demandar; Es que an pensat al vent d'Autan?
Soi demorat de temps a Tolosa dins un apartament agradiu mas plan naut de nivel al dessus de Garòna, e me'n vesiai per far venir sul balcon qualques plantas e flors.,Ai pron pena d'imaginar çò que va donar, las plantacions dins aquela espirala cap a sabi pas quina auçada, quand l'Autan va bufar e s'engulhar aqui dedins; e ai plan paur que las polidas terrassas verdas e arboradas de la maqueta venguen leu fach un desèrt terros e abandonat....

  • 8
  • 0

Escriu un comentari sus aqueste article